एजेन्सी – रियल म्याड्रिडका युवा फरवार्ड रोड्रीगो पहिलोपटक ब्राजिलियन राष्ट्रिय फुटबल टोलीमा परेका छन् । प्रशिक्षक टिटेले मैत्रीपूर्ण खेलका लागि घोषणा गरेको टोलीमा नेयमार भने चोटका कारण विश्राम दिएका छन् ।
ब्राजिलले मैत्रीपूर्ण खेल अन्तर्गत नोभेम्बर १५ मा साउदी अरेबियामा हुने खेलमा अर्जेन्टिनाको सामना गर्दैछ । त्यसको ४ दिनपछि नै ब्राजिलले आबुधबीमा हुने खेलमा दक्षिण कोरियासँग खेल्नेछ । प्रशिक्षक टिटेले ब्राजिलियन लिगमा खेल्ने कुनै खेलाडीलाई टोलीमा राखेका छैनन् । ब्राजिलियन लिगको अन्तिम चरण चलिरहेको कारण उनले युरोपेली लिगका अधिकांश खेलाडी समेटेका हुन् ।
टोलीमा एस्टन भिल्लाका डग्लस लुइज पनि पहिलो पटक टोलीमा समेटिएका छन् । रोमाका गोलरक्षक ड्यानीएल फुजातो र रियल बेटिसका डिफेन्डर एमरसन पनि टोलीमा पहिलोपटक रहेका छन् ।
ब्राजिल टोली :
गोलरक्षक – एलिसन, एडरसन, ड्यानीएल फुजातो
डिफेन्डर – ड्यानीलो, एमरसन, एलेक्स स्यान्ड्रो, रेनान लोडी, थियागो सिल्भा, मर्किन्होस, एडर मिलिसाओ, फिलिपे
मिडफिल्डर – क्यासेमिरो, आर्थर, फाबिन्हो, डग्लस लुइज, फिलिपे कोउटिन्हो, लुकास पाकेटा, विलियन
फरवार्ड – डेविड नेरेस, रोबर्टो फिर्मिनो, ग्यब्रिएल जेसस, रोड्रीगो, रिचार्लीसन