भारतविरुद्ध रोमांचक जितसँगै न्युजिल्यान्डद्वारा टि-२० सिरिज कब्जा !

एजेन्सी – निर्णायक टि-२० खेलमा भारतलाई ४ रनले पराजित गर्दै न्युजिल्यान्डले टि-२० सिरिज २-१ ले कब्जा गरको छ । जितका लागि अन्तिम ओभरमा १६ रन चाहिएको अवस्थामा टिम साउथीले ११ रनमात्र खर्चेपछि घरेलु टोलीको जित पक्का भएको हो ।

आइतबार भएको निर्णायक खेलमा भारतले २ सय १३ रनको विशाल लक्ष्य पछ्याउने क्रममा निर्धारित २० ओभरमा ६ विकेट गुमाई २ सय ८ रनमात्र जोड्न सक्यो । क्रुनाल पान्ड्या र दिनेश कार्तिकले सातौं विकेटका लागि आक्रामक साझेदारी गरेपनि मध्यक्रममा अपेक्षित प्रदर्शन हुन नसक्दा भारतले पराजय भोग्नुपर्यो ।

सातौं विकेटका लागि क्रुनाल र दिनेशले ४.४ ओभरमा नटआउट ६३ रनको साझेदारी गरेपनि जित दिलाउन सकेनन् । दिनेश १६ बलमा ४ छक्कासहित ३३ रनमा नटआउट रहँदा क्रुनालले २ चौका र २ छक्कासहित १३ बलमा २६ रनको योगदान दिए । भारतका लागि महेन्द्रसिंह धोनी २ र ओपनर शिखर धवन ५ रनमा पेभेलियन फर्केका थिए ।

कप्तान रोहित शर्माले ३२ बलमा ३८ रन जोड्दा विजय शंकरले २८ बलमा ५ चौका र २ छक्कासहित ४३ रनको योगदान दिए । ऋषभ पन्तले १२ बलमा १ चौका र ३ छक्कासहित २८ रन जोड्दा हार्दिक पान्ड्याले ११ बलमा १ चौका र २ छक्कासहित २१ रन जोडे । न्युजिल्यान्डका लागि मिचेल सान्टनर र डेरील मिसेलले २-२ तथा स्कट कुग्गेलेजिन र बलेर तिक्नरले १-१ विकेट हात पारे ।

त्यसअघि टस हारेर ब्याटिङको निम्तो पाएको न्युजिल्यान्डले आक्रामक सुरुवात पाएपछि २० ओभरमा ४ विकेट गुमाउँदै २ सय १२ रन जोडेको थियो । टिम सिफर्ट र कोलिन मुनरोले आठौं ओभरमा नै ८० रन पुर्याएका थिए । सिफर्ट २५ बलमा ३ चौका र ३ छक्कासहित ४३ रन जोड्दै आउट भए । मुनरोले त्यसपछि आक्रामक ब्याटिङ गर्दै ४० बलमा समान ५ चौका र ५ छक्कासहित ७२ रनको उत्कृष्ट इनिङ खेले । उनी खेलको म्यान अफ द म्याच पनि भए ।

कप्तान केन विलियमसनले २१ बलमा २७ रन जोड्दा कोलिन डे ग्रान्डहोमले १६ बलमा ३ चौका र १ छक्कासहित ३० रनको योगदान दिए । डेरील मिसेलले ११ बलमा १९ तथा रोस टेलरले ७ बलमा १४ रन जोडे । भारतका कुलदिप यादवले २ तथा भुवनेश्वर कुमार र खलिल अहमदले १-१ विकेट हात पारे ।

ओडीआई सिरिजमा ४-१ को फराकिलो हार बेहोरेको न्युजिल्यान्डले टि-२० सिरिज भने २-१ ले जितेको छ । पहिलो खेलमा फराकिलो जित दर्ता गरेको न्युजिल्यान्ड दोस्रो खेलमा भने पराजित भएको थियो । यस सिरिज हारसँगै भारतको लगातार १० टि-२० सिरीज जितको सिलसिलमा पूर्णविराम लागेको छ ।

प्रकाशित : आइतबार, माघ २७, २०७५११:३२

११ खेलाडीले नै पेनाल्टी हान्दा पनि खेल बराबर ! अँध्यारो भएर बल नदेखिएपछि खेल स्थगित !