एजेन्सी– यो वर्ष जापानमा ओलम्पिक आयोजना हुँदैछ । ब्राजिलियन सुपर स्टार नेयमार त्यसमा खेल्न चाहान्छन् । त्यसअघि कोपा अमेरिकामा पनि आयोजना हुनेछ । कोपा अमेरिका जुन १२ देखि जुलाई १२ सम्म कोलम्बिया र अर्जेन्टिनाले संयुक्त रुपमा आयोजना गर्दैछन् । त्यस्तै ओलम्पिक जुलाई २४ देखि अगष्ट ५ सम्म आयोजना हुनेछ ।
तर, नेयमारका लागि सन् २०१६ कै अवस्था दोहोरिने सम्भावना छ । त्यति बेला उनी बार्सिलोनामा थिए । त्यति बेला स्वदेशमै आयोजना भएको ओलम्पिक खेल्न क्लबबाट नेयमारले अनुमति पाएका थिए । तर, उनले सोही वर्ष आयोजना भएको कोपा अमेरिका खेल्न पाएनन् ।
‘म दुवै खेल्न चाहन्छु । तर मलाई थाहा छ त्यो सहज छैन,’ समरको योजनाका बारेमा पेरिस सेन्ट जर्मेनका फरवार्ड नेयमारले भने,‘ म दुवै खेल्नका लागि उपलब्ध छु । तर, मलाई लाग्छ त्यो जटिल छ । किन की त्यहि समयमा क्लबको सिजन पनि सुरु हुनेछ ।’
त्यति बेला पनि आफुले दुवै प्रतियोगिता खेल्न चाहेको स्मरण गर्दै उनले भने, ‘ तर मलाई बार्सिलोनाले त्यो अनुमति दिएन ।’ उनले दुवै प्रतियोगिता खेल्नका लागि क्लबसँग छलफल गर्ने बताएका छन् ।
उनले थपे ‘ म ब्राजिलियन टोलीमा बसेर सहयोग गर्न चाहन्छु ।’ २०१६ को रियो ओलम्पिकमा ब्राजिलले स्वर्ण पदक जितेको थियो । त्यति बेला नेयमारले महत्वपूर्ण भूमिका निर्वाह गरेका थिए ।
