एजेन्सी – स्पेनिस ला लिगामा रियल म्याड्रिडले सहज जित हात पार्दै उपाधिको सम्भावनालाई जीवितै राखेको छ ।रियलले घरेलु टोली क्याडिजलाई २–० ले पराजित गर्दै शीर्षस्थानको बार्सिलोनासँगको अंक दुरी छोट्याएको हो ।
रियलको जितमा नाँचो फर्नान्डेस र मार्काे एसेन्सियोले गोल गरे । दुवै गोल दोस्रो हाफमा भएको थियो । क्याडिजमा शनिबार राति भएको खेलमा रियलले घरेलु टोलीलाई खेलको सुरुवातदेखि नै दवावमा राखेपनि गोलको लागि दोस्रो हाफ नै कुर्नुपरेको थियो ।
७२औं मिनेटमा नाँचोले गोल गर्दै रियललाई १–० को अग्रता दिलाए । उनले ओरेलिएन चुआमेनीको पासमा गोल गर्न सफल भएका थिए । त्यसको चार मिनेटपछि मार्काे एसेन्सियोले फेडरिको भाल्भेर्डेको पासमा गोल गर्दै रियलको जित पक्का गराए ।
यस जितसँगै रियलले क्याडिजलाई दुई खेलपछि पराजित गर्न सफल भएको छ । २२ अप्रिल २०२१ मा ३–० को जित निकालेयता रियलले क्याडिजलाई हराउन सकेको थिएन । जसमा गोलरहित बराबरी र १–१ गोलको नतिजा छ ।
यस जितसँगै रियलले बार्सिलोनासँगको अंक दुरी १० मा छोट्याएको छ । एक खेल कम खेलेको बार्सिलोनाको ७२ अंक रहँदा रियलको ६२ अंक छ । पराजित क्याडिज ३१ अंक जोडेर १५औं स्थानमा छ ।
