एजेन्सी – च्याम्पियन्स लिगको क्वाटरफाइनलको पहिलो लेगका लागि प्रिमियर लिग क्लब चेल्सीले म्याड्रिडको भ्रमण गर्यो। सेमिफाइनल प्रवेश गर्ने टोलीको टुंगो लगाउन चेल्सीले यसै साता सान्टियागो बर्नाबेउको भ्रमण गरेको हो।
चेल्सीका लागि सान्टियागो बर्नाबेउको भ्रमण भने सुखद रहेन। किनकि सान्टियागो बर्नाबेउमा चेल्सी २-० को हार बेहोर्न बाध्य भयो। सान्टियागो बर्नाबेउमा चेल्सीले न त बलमा राम्रो नियन्त्रण राख्न सक्यो, न त खुलेर आक्रमण गर्न नै सक्यो।
चेल्सी विरुद्ध करिम बेन्जेमा र मार्काे एसेन्सियोले गोल गरेका थिए। ती दुवै गोल एक खेलाडीका कारण सम्भव भएको थियो र ती थिए भिनिसियस जुनियर। ब्राजिलियन विंगरले दुवै गोलका लागि पास निकालेका थिए।
चेल्सी विरुद्ध भिनिसियस जुनियर उच्च स्तरमा देखिएका थिए। उनको उच्च प्रदर्शनले नै चेल्सीलाई घुँडा टेकाउन सफल भएको थियो। भिनिसियस जुनियरको प्रदर्शन देखेर चेल्सीका सह-मालिक टोड बोहली समेत छक्क परेको बताइएको छ।
भिनिसियसको प्रदर्शन देखेर चेल्सीका सह-मालिक बोहली अचम्मित भएको स्पेनिस पत्रिका एल नासियोनलले जनाएको छ। एल नासियोनलका अनुसार भिनिसियसको प्रदर्शन पछि बोहलीले रियलका मालिकलाई ‘भिनी बिक्री गर्ने हो, हो भने भनिहाल्नुस्’ भनेका थिए।
गत सिजन देखि नै उच्च लयमा रहेका भिनिसियसले रियल म्याड्रिडका लागि यस सिजन कुल ४५ खेल खेलेका छन्। यस बीचमा उनले २१ गोल गरिसकेका छन् भने १६ असिस्ट दिसकेका छन्।
