एजेन्सी – विपक्षी टोलीको डिफेन्स तोडेर गोल गर्न नसक्दा पोर्चुगिज स्टार क्रिस्टियानो रोनाल्डो सम्मिलित अल नासर रोकिएको छ। साउदी प्रो लिग अन्तर्गतको खेलमा अल नासर आइतबार राति बराबरीमै रोकिएको हो।
शनिबार राति सिजनको २३ औं खेलमा अल नासरले अल फेहाको सामना गर्यो। किंग सलमान स्पोर्ट सिटी स्टेडियममा अल नासरले आइतबार राति अल फेहाको सामना गरेको हो।
खेलभर बलमा राम्रो नियन्त्रण राखेर पनि अल नासरले गोलको खाता भने खोल्न सकेन। खेलभर अल नासरले बलमा ५९ प्रतिशत नियन्त्रण राखेको थियो। खेलभर अल नासरको तर्फबाट १८ प्रहार भएका थिए।
त्यसमध्ये ३ प्रहार मात्र टार्गेटमा थिए र एक प्रहार पनि गोलमा परिणत हुन सकेन। अल फेहाको तर्फबाट भने खेलभर मात्र ५ प्रहार भएका थिए। त्यसमध्ये १ मात्र प्रहार टार्गेटमा थियो।
आक्रमण गर्न नसकेपनि अल फेहाले अल नासर विरुद्ध धेरै रक्षात्मक खेल प्रदर्शन गरेको थियो। अल फेहासँग बराबरी खेलेसंगै अल नासरलाई ठूलो झड्का लागेको छ। साउदी प्रो लिगको उपाधि होडमा अल नासरलाई ठूलो धक्का लागेको हो।
अल नासर शिर्ष स्थानको अल इत्तिहाद भन्दा ३ अंकले पछाडी रहेको छ। सिजनका २३ खेल खेल्दा अल नासरले १६ जित, २ हार र ५ बराबरी सहित ५३ अंक बटुलेको छ। अल फेहा भने २५ अंक जोडेर लिगको ११ औं स्थानमा रहेको छ।
