एजेन्सी – क्याटलान क्लब बार्सिलोनाले क्लबका तीन स्टार खेलाडीहरुलाई बिक्रीको सूचीमा राखेको छ। विभिन्न खेल मिडियाहरुका अनुसार बार्सिलोनाले तीन युवा स्टारलाई बिक्रीको सूचीमा राखेको हो।
बार्सिलोनाले राफिन्हा, फेरान टोरेस र अन्सु फाती तीन युवा स्टारलाई आउने समर ट्रान्सफर विन्डोमा बिक्री गर्न सक्ने विभिन्न स्पेनिस मिडियाहरुले जनाएका छन्। स्पेनिस प्रकाशन स्पोर्टका अनुसार तीनै खेलाडीलाई बार्सिलोनाले आउने समर विन्डोमै बिक्री गर्न सक्नेछ।
बार्सिलोनाले लामो समयदेखि फातीका प्रतिनिधिहरूसँग वार्ता गरिरहेको छ। यो मानिन्छ कि म्यानचेस्टर युनाइटेड लगायत धेरै युरोपेली शीर्ष क्लबहरूले फातीमा चासो देखाएका छन्। यो सिजन फातीले बार्सिलोनाका लागि ४० खेलमा २० वर्षिय खेलाडीले सात गोल र तीन असिस्ट दिएका छन्।
गत समर लिड्स युनाइटेडबाट बार्सिलोना आएका राफिन्हालाई पनि बार्सिलोनाले बिक्री गर्ने योजना बनाएको छ। यस सिजन बार्साका लागि ३९ खेलमा ब्राजिलियन विङ्गरले ९ गोल गरेका छन् भने ९ नै असिस्ट दिएका छन्। खबरका अनुसार राफिन्हालाई प्रिमियर लिग क्लब चेल्सीले भित्र्याउने चाहेको छ।
यस्तै म्यानचेस्टर सिटीबाट सन् २०२१ को जनवरीमा बार्सा आइपुगेका टोरेसबाट पनि क्लबले छुटकारा पाउन चाहेको छ। उनका लागि बार्सिलोनाले ५५ मिलियन युरो खर्च गरेको थियो।
२३ वर्षीय विङ्गरले ३६ खेलमा ६ गोल र दुई असिस्ट दिएका छन्। संघर्षको बावजुद स्पेनियार्डलाई एट्लेटिको म्याड्रिड र इन्टर मिलानले नजर लगाइरहेका छन्। तर कुनै पनि क्लब उनका लागि बार्सिलोनाले खर्च गरे बराबर रकम खर्च गर्न भने तयार छैनन्।
