एजेन्सी – शनिबार राति लालिगामा रियल म्याड्रिडले नचाहेको नतिजा निस्कियो। घरेलु मैदानमै रियल भिल्लारियल विरुद्धको खेलमा ३-२ को गोल अन्तरले पराजित हुन पुग्यो।
रियलले बलमा कम नियन्त्रण राख्दा सहि तरिकाले आक्रमण पनि गर्न चुक्यो। रियलले खेलभर बलमा ४९ प्रतिशत नियन्त्रण राखेको थियो। खेलभर रियलको तर्फबाट कुल १८ प्रहार भएका थिए। ती मध्ये ४ प्रहार मात्रै टार्गेटमा थिए। त्यस्तै पाहुना टोली भिल्लारियलको तर्फबाट १७ प्रहार भएका थिए। त्यसमध्ये ८ प्रहार टार्गेटमा थिए।
भिनिसियस जुनियरले एक गोल गर्दा एक गोल भने रियलले उपहारमा पाएको थियो। भिल्लारियलका लागि भने सामुइल चुकविजीले दुई तथा जोश लुइस मोरालेसले एक गोल गरेका थिए।
भिल्लारियल विरुद्ध हरेसँगै रियल लालिगा उपाधि होडमा धेरै पछि परेको छ। रियलको पराजयले क्याटलान क्लब बार्सिलोनालाई १५ अंकको अग्रता बनाउने अवसर मिलेको छ। रियल भन्दा एक कम खेल खेल्दै बार्सिलोनाले १२ अंकको अग्रता बनाइसकेको छ।
रियल हार्दा बार्सा खेलाडीहरु मख्ख
रियल पराजित भएसँगै बार्सा खेलाडीहरु हुन सम्म खुशी भएका छन्। स्पेनिस मिडियाहरुका अनुसार रियलको हारलाई बार्सिलोनाका खेलाडीहरुले उत्सव जस्तै मनाएका छन्। सामाजिक संजाल ग्रुपमा बार्सिलोनाका खेलाडीहरुले रियलको हारसंगै एक अर्कालाई बधाई दिएको विभिन्न स्पेनिस मिडियाहरुले जनाएका छन्।
