एजेन्सी – म्यानचेस्टर युनाइटेडले इंग्लिस प्रिमियर लिगमा हार बेहोरेको छ । युनाइटेड घरेलु टोली न्यूक्यासल युनाइटेडसँग २–० ले पराजित भएको हो ।
न्यूक्यासलको जितमा जोसेफ विललक र कलुम विल्सनले गोल गरे । दुवै गोल दोस्रो हाफमा भएको थियो । सेन्ट जेम्स पार्क न्यूक्यासलमा आइतबार राति भएको प्रतिस्पर्धात्मक र रोमाञ्चक बनेको खेलको ६५औं मिनेटमा जोसेफ विललकले गोल गरेपछि युनाइटेड खेलमा १–० ले पछि पर्यो ।
उनले एलन सेन्ट म्याक्सिमिनको पासमा हेडरमार्फन गोल गर्न सफल भएका थिए । त्यसपछि ८८औं मिनेटमा कलुम विल्सनले गोल गर्दै म्यानचेस्टरलाई २–० को हार चखाए । विल्सनले काइरन ट्रिपिएरको पासमा हेडरमार्फत गोल गर्न सफल भएका थिए ।
यस जितसँगै न्यूक्यासल २७ खेलबाट ५० अंक जोडेर तेस्रो स्थानमा उक्लिएको छ । पराजित युनाइटेडको ५० अंक नै भएपनि गोल अन्तरमा चौथो स्थानमा झरेको छ ।
