एजेन्सी – आइतबार राति प्रिमियर लिगको जारी सिजनको २५ औं खेलमा म्यानचेस्टर युनाइटेडले लज्जास्पद हार बेहोर्यो। लिभरपुलको घरेलु मैदानमा आइतबार राति युनाईटेडले ७-० को गोल अन्तरको हार बेहोरेको हो।
यो प्रिमियर लिगमा युनाइटेडले बेहोरेकोको सबै भन्दा ठूलो हार हो। पहिलो हाफमा सम्हालिएर प्रदर्शन गरेपनि दोस्रो हाफमा निरिह देखिँद युनाइटेडले ७-० को लज्जासपास बेहोर्न बाध्य भएको हो।
एनफिल्डमा युनाइटेडले बलमा त्यति राम्रो नियन्त्रण राख्न सकेन। खेलभर बलमा युनाइटेडको ४० प्रतिशत नियन्त्रण थियो। बल नियन्त्रणमा मात्र नभई युनाइटेड आक्रमणमा पनि कम्जोर देखिएको थियो।
खेलभर युनाइटेडको तर्फबाट कुल ८ प्रहार भएका थिए। त्यसमध्ये ४ प्रहार टार्गेटमा थिए। तर त्यसमध्ये एक प्रहार पनि गोलमा परिणत हुन सकेनन्। जबकी लिभरपुलबाट कुल १८ प्रहार हुँदा ८ प्रहार टार्गेटमा थिए र ७ प्रहार गोलमा परिणत भए।
लिभरपुलसँग पराजित भएपछि यति बेला पोर्चुगिज स्टार क्रिस्टियानो रोनाल्डो समर्थक भने धेरै मख्ख देखिएका छन्। यति बेला रोनाल्डो समर्थकहरु सामाजिक संजालमा युनाइटेडको मजाक उडाइरहेका छन्।
रोनाल्डोको बहिर्गमन पछि युनाइटेड लयमा फर्किएको भन्ने तर्क गर्ने गरिएका कारण बिच्किएका रोनाल्डो समर्थकले युनाइटेडको लज्जास्पद हारलाई उत्सवको रुपमा लिरहेका छन्।
सामाजिक संजालमा रोनाल्डो समर्थकहरुले युनाइटेडलाई नराम्रोसँग ट्रोल गरिरहेको देख्न सकिन्छ। त्यसमध्ये धेरैले ७ गोल गरेर लिभरपुलले रोनाल्डोलाई ट्रिब्युट दिएको टिप्पणी गरिरहेका छन् भने केहिले युनाइटेडलाई पाठ पढाएको भन्दै लिभरपुललाई धन्यबाद दिएका छन्।
