एजेन्सी – साउदी सुपर कपको सेमिफाइनलमा आज अल इतिहाद र अल नासर आमने-सामने हुँदैछन्। साउदी सुपर कपको फाइनल प्रवेशका लागि साउदी प्रो लिगका प्रतिद्वन्दी क्लबहरु आज राति आमने-सामने हुन लागेका हुन्।
रियादको किंग फहद इन्टरनेशनल स्टेडियममा साउदी सुपर कपको सेमिफाइनलमा अल इतिहादसँग अल नासरको सामना हुनेछ। सो खेल नेपाली समय अनुसार रातको ११ बजेर ४५ मिनेटमा सुरु हुनेछ।
अल इतिहाद विरुद्धको खेलमा पोर्चुगिज स्टार क्रिस्टियानो रोनाल्डो पनि खेल्ने उच्च सम्भावना रहेको छ। रोनाल्डोले आफ्नो नयाँ क्लबका लागि दोस्रो खेलको रुपमा अल इतिहाद विरुद्ध खेल्न सक्नेछन्।
रोनाल्डोले यहि आइतबार अल नासरका लागि डेब्यू गरेका थिए। दुई खेलको प्रतिबन्धका कारण साउदी पुगेको केहि समय डेब्यू गर्न नपाएका रोनाल्डोले यहि आइतबार अल एतिफाक विरुद्धको खेलमा डेब्यू गरेका थिए। रोनाल्डो सो खेलमा चलायमान देखिएका थिए। यधपी उनले सो खेलमा गोल गर्न भने सकेनन्।
अल इतिहाद विरुद्ध मैदानमा उत्रँदा रोनाल्डो आज नयाँ क्लबका लागि पहिलो गोल गर्ने दाउमा हुनेछन्। पहिलो खेलमा गोल गर्न चुकेपनि आज गोल गर्न सकेको खण्डमा रोनाल्डोको गोलको खाता मात्र खुल्ने छैन, केहि नयाँ रेकर्डहरु पनि बनाउन सक्नेछन्।
रोनाल्डोले साउदी आउनु भन्दा अगाडी म्यानचेस्टर युनाइटेड, युभेन्टस, रियल म्याड्रिड लगायत क्लबहरुबाट फुटबल खेलेका थिए। युरोपमा हुँदै रोनाल्डोले क्लब फुटबलमा सम्भव सबै उपाधि जितेका थिए।
