एजेन्सी – प्रिमियर लिग क्लब म्यानचेस्टर युनाइटेडले इएफएल अर्थात कारवाओ कपको सेमिफाइनलको पहिलो लेगमा सहज जित हात पारेको छ ।
युनाइटेडले प्रिमियर लिग प्रतिद्धन्द्धी नटिङहम फरेस्टमाथि उसकै मैदानमा ३–० को सहज जित हात पार्दै फाइनल पुग्ने सम्भावना बलियो बनाएको छ ।
दि सिटी ग्राउण्ड नटिङहममा बुधबार राति भएको खेलमा युनाइटेडको सहज जितमा मार्कस रासफर्ड, वोउट वेगह्रष्ट र ब्रुनो फर्नान्डेसले गोल गरे । पहिलो हाफमा दुई तथा दोस्रो हाफमा एक गोल भएको थियो ।
खेलको छैटौं मिनेटमा नै रासफर्डले गोल गर्दै युनाइटेडलाई १–० को अग्रता दिलाए । उनले क्यासमिरोको पासलाई सदुपयोग गरे । ४५औं मिनेटमा वेगह्रष्टले गोल गर्दै युनाइटेडको अग्रता दोब्बर पारे ।
त्यसपछि खेलको अन्त्यतिर ८९औं मिनेटमा ब्रुनो फर्नान्डेसले गोल गर्दै युनाइटेडलाई ३–० को सहज जित दिलाए । उनले एन्थोनी एलांगाको पासलाई सदुपयोग गरेका थिए ।
दोस्रो लेगको खेल एक सातापछि युनाइटेडको मैदानमा हुनेछ । अर्काे सेमिफाइनलको पहिलो लेगमा न्यूक्यासल युनाइटेडले साउथह्याम्टनलाई १–० ले पराजित गरेको छ । दोस्रो लेग अर्काे साता नै हुनेछ । फाइनल २६ फेब्रुअरीमा हुनेछ ।
