एजेन्सी – पोर्चुगिज फरवार्ड क्रिस्टियानो रोनाल्डो अन्तत: साउदी क्लब अल नासर जाने भएका छन् । युरोपका क्लबबाट अनुबन्धनका लागि कुनै प्रस्ताव नआएपछि रोनाल्डो अल नासर जाने युरोपेली संचारमाध्यमले जनाएका छन् ।
पोर्चुगलका केहि क्लबले रोनाल्डोको अवस्थाबारे जानकारी लिएपनि आर्थिक रुपमा उनको माग पूरा गर्न नसक्ने हुँदा क्लब पछि हटेका थिए । यसअघि नै रोनाल्डोका एजेन्ट जोर्गे मेन्डेसले युरोपेली क्लबहरुलाई रोनाल्डो अनुबन्धनका लागि प्रयास गरेका थिए । तर त्यो सफल हुन सकेन ।
रोनाल्डोले च्याम्पियन्स लिग खेल्ने इच्छा देखाएपनि शीर्ष क्लबले उनलाई आफ्नो योजनामा समेट्न नसक्ने बताएका थिए । विशेषगरी चेल्सीका नयाँ मालिकले रोनाल्डोलाई मुख्य अनुबन्धनको रुपमा ल्याउन खोजेका थिए । तर तत्कालिन प्रशिक्षक थोमस टुचेलले आफ्नो योजनामा नरहने भन्दै ट्रान्सफर हुन दिएनन् ।
जर्मन क्लब बायर्न म्युनिख, बोरुसिया डर्टमुन्ड र आइन्ट्राक्ट फ्रान्कफर्टले पनि रोनाल्डो अनुबन्ध नगर्ने सार्वजनिक रुपमा बताएका थिए । रियल म्याड्रिडले दुवै पक्षका लागि रोनाल्डोको आगमन राम्रो नहुने बताउँदा अर्को पूर्व क्लब सपोर्टिङ लिस्बनले आर्थिक कारणले सम्भव नरहने बताएको थियो ।
रोनाल्डोलाई अल नासरले कुल ७ वर्षको सम्झौता गर्ने तयारी गरेको छ । यस अनुसार ३ वर्ष खेलाडीको भूमिकामा र ४ वर्ष सद्भावना दुतको रुपमा उनले समय बिताउनेछन् । रोनाल्डोले यसका लागि मौखित सहमति गरेको र अब पूर्ण लिखित सहमति केहि दिनमा हुने बुझिएको छ ।
