एजेन्सी – आर्थिक समस्यासँग जुधिरहेको क्याटलान क्लब बार्सिलोनाले अर्का एक खेलाडी पनि फ्री ट्रान्सफरमा भित्र्याउन सक्ने सम्भावना देखिएको छ। विभिन्न खेल मिडियाहरुका अनुसार गएको केहि समय देखि फ्री ट्रान्सफरमा खेलाडी भित्र्याउन थालेको बार्सिलोनाले आर्का एक महत्वपूर्ण खेलाडी पनि फ्री ट्रान्सफरमै भित्र्याउने भएको हो।
प्रिमियर लिग क्लब चेल्सीका मिडफिल्डर एनगोलो कान्टेलाई बार्सिलोनाले फ्री ट्रान्सफर विन्डोमा भित्र्याउने भएको स्पेनिस मिडियाहरुले जनाएका छन्। कान्टे र बार्सिलोना सहमति नजिक रहेको स्पेनिस मिडियाहरु बताउँछन्।
स्पेनिस आउटलेट स्पोर्टले गरेको दावीलाई मान्ने हो भने कान्टे बार्सिलोना जान इच्छुक छन्। जनवरी ट्रान्सफर विन्डोमा बार्सिलोना र कान्टे बीच अग्रिम सम्झौता हुन सक्ने उच्च सम्भावना रहेको स्पोर्टले दावी गरेको छ। दुई पक्ष बीच भएको छलफल सहि दिशामा अगाडी बढेको छ र दुई पक्ष बीच जनवरीमा सम्झौता हुने उच्च सम्भावना छ।
यहि सिजनको अन्त्यपछि कान्टे र चेल्सी बीचको सम्झौता सकिनेछ। सिजन सकिनु भन्दा अगाडी नै जनवरीबाट उनले विश्वका जुन सुकै क्लबसँग अग्रिम सम्झौता गर्न सक्छन्। फ्री ट्रान्सफरमा उपलब्ध हुने हुँदा उनलाई अन्य क्लबले पनि भित्र्याउन चाहेका छन्। त्यसमध्येमा इटालियन क्लब युभेन्टस समेत रहेको छ।
चेल्सीका कान्टेलाई विश्वका उत्कृष्ट मिडफिल्डरमध्ये एक मानिन्छ। पछिल्लो दुई सिजन चोटका कारण धेरै राम्रो प्रदर्शन गर्न नसकेपनि त्यसभन्दा अगाडी उनी उच्च लयमा थिए। चोटबाट मुक्त भएपछि उनी पुनः राम्रो लयमा फिर्ता हुन सक्छन्।
