एजेन्सी – विंगर सर्ज जिनाब्रीले ह्याट्रिक प्रहार गरेपछि बायर्न म्युनिखले जर्मन बुन्डेसलिगामा सानदार जित दर्ता गरेको छ । घरेलु मैदानमा बायर्नले वेडर ब्रेमेनलाई ६–१ ले पराजित गरेको हो ।
बायर्नको सानदार जितमा जिनाब्रीले ह्याट्रिक पूरा गर्दा जमल मुसिएला, लियोन गोरेट्जका र म्याथिज टेलले समान एक गोल गरे । ब्रेमेनका एन्थोनी जङले एक गोल फर्काए ।
एलिएन्ज एरिना म्युनिखमा मंगलबार राति भएको खेलको छैटौं मिनेटमा जमल मुसिएलाको गोलबाट बायर्नले सुरुवाती अग्रत लिन सफल भयो । १०औं मिनेटमा एन्थोनी जङले गोल गर्दै खेललाई १–१ गोलको बराबरीमा ल्याए ।
१८औं मिनेटमा एरिक म्याक्सिम चुपो मोटिङ पेनाल्टीमा चुक्दा बायर्न अग्रता लिनबाट चुक्यो । २२औं मिनेटमा सर्ज जिनाब्रीले गोल गर्दै बायर्नलाई २–१ को अग्रता दिलाए । २६औं मिनेटमा लियोन गोरेट्जकाले योसुवा किम्मिखको पासमा गोल गर्दै बायर्नलाई ३–१ ले अघि बढाए ।
२८औं मिनेटमा जिनाब्रीले लिरोए सानेको पासमा व्यक्तिगत दोस्रो तथा टोलीका लागि चौथो गोल गरेपछि बायर्नले पहिलो हाफमा ४–१ को आरामदायी अग्रता लिन सफल भयो ।
८२औं मिनेटमा जिनाब्रीले ह्याट्रिक पूरा गरेपछि बायर्न खेलमा ५–१ ले अघि बढ्यो । ८४औं मिनेटमा म्याथिज टेलले गोल गर्दै बायर्नलाई ६–१ को फराकिलो जित दिलाए ।
यस फराकिलो जितसँगै शीर्षस्थानमा रहेको बायर्नको १४ खेलबाट ३१ अंक पुगेको छ । बायर्नले शीर्षस्थानमा एक खेल कम खेलेको फ्रेइवर्गलाई ४ अंकले पछि पारेको छ । पराजित ब्रेमेन २१ अंक जोडेर सातौं स्थानमा रहेको छ ।
बुन्डेसलिगाकै अर्काे खेलमा बोरुसिया डर्टमुन्ड वल्फ्सवर्गसँग २–० ले पराजित भएको छ ।
