एजेन्सी – म्यानचेस्टर सिटीका प्रशिक्षक पेप गुआर्डीओलाले मिडफिल्डर केभिन डे ब्रुएनले अझै राम्रो प्रदर्शन गर्न सक्ने बताएका छन् । शनिबार ब्राइटनविरुद्ध उत्कृष्ट गोल गरेका डे ब्रुएनको प्रशंसा गर्दै गुआर्डीओलाले आफ्नो धारणा राखेका हुन् ।
बेल्जियन मिडफिल्डर डे ब्रुएनले यस सिजन २ गोल र ९ असिस्ट प्रदान गरिसकेका छन् । सिटीले एर्लिङ हालान्ड अनुबन्ध गरेपछि आक्रमणमा डे ब्रुएन अझै छाएका छन् । तर प्रशिक्षक गुआर्डीओलाले आफ्नो उपकप्तानबाट अझ बढी अपेक्षा गरिरहेको बताउँछन् ।
‘केभिन अझ राम्रो हुन सक्छन्,’ गुआर्डीओलाले खेलपछि भने,’ उनी आफ्नो उच्च स्तरमा खेलिरहेका छैनन् । अझै छैन ।’
‘उनको गोल उत्कृष्ट थियो । दर्शनीय गोल । तर उनी आफ्नो उच्च लयमा भने खेलिरहेका छैनन् । उनी आफैंलाई पनि यो थाहा छ । मैले उनीसँग छलफल गरेको छु तर मैले उनलाई यो भनिरहन पर्दैन ।’
