एजेन्सी – टोटनह्याम हटस्परका डिफेन्डर क्रिस्टियन रोमेरोले विश्वका कुनै पनि खेलाडीको लियोनेल मेस्सीसँग तुलना हुन नसक्ने बताएका छन्। अर्जेन्टिनाको राष्ट्रिय टोलीबाट मेस्सीसँगै फुटबल खेल्ने रोमेरोले एक अन्तर्वार्ताका क्रममा मेस्सीको तुलना कसैसँग पनि गर्न नसकिने बताएका हुन्।
स्काई स्पोर्ट्ससँग कुराकानी गर्नेक्रममा रोमेरोले मेस्सी जस्तो खेलाडी आफूले कहिल्यै नदेखेको र उनको कुनै पनि खेलाडीसँग तुलना हुन नसकने बताए। मेस्सीको स्तर नै छुट्टै रहेको रोमेरोको भनाई छ। मेस्सीसँग खेल्न पाउनु गर्वको कुरा रहेको उनले बताए।
“मेरो लागि मेस्सी फरक खालका खेलाडी हुन्। उनको स्तर नै छुट्टै छ। उनी जस्तो खेलाडी मैले मेरो जीवनमा देखेको छैन। मेस्सी अविश्वसनीय चीजहरू गर्न सक्छन्। मलाई लाग्दैन कि मेस्सीको तुलना कोहिसँग हुन सक्छ। उनीसँग खेल्न पाउनु गर्वको कुरा हो।”,रोमेरोले भने।
रोमेरोले भने जस्तै विश्व फुटबलमा मेस्सीको तुलना सायदै कसैसँग गर्न सकिन्छ। मेस्सी लामो समय देखि विश्व फुटबलमा राज गरिरहेका छन्। लामो खेल जीवनमा मेस्सीले क्लब फुटबलमा जित्न सम्भव सबै उपाधि जितिसकेका छन्। गत वर्ष मात्रै उनले अर्जेन्टिनाका लागि कोपा अमेरिकाको उपाधि जितेका थिए।
त्यस्तै आउने केहि महिनामा विश्वकप हुँदैछ। सम्भवतः यो मेस्सीको अन्तिम विश्वकप हुन सक्छ। यस्तोमा उनी अर्जेन्टिनालाई विश्वकप दिलाउन भरपुर प्रयास गर्नेछन्। गत सिजन पेरिस सेन्ट जर्मेन(पिएसजी)मा घुलमिल हुन मेस्सीलाई केहि कठिन परेपनि जारी सिजनमा भने मेस्सी सुधारिएको प्रदर्शन गरिरहेका छन्।
