एजेन्सी – इंग्लिस क्लब लिभरपुलले डच क्लब आयाक्समाथि रोमाञ्चक जित निकालेको छ । घरेलु मैदानमा लिभरपुलले आयाक्सलाई २–१ ले पराजित गरेको हो । एनफिल्डमा मंगलबार राति भएको खेलमा लिभरपुलको जितमा मोहम्मद सलाह र जोएल मटिपले गोल गरे । आयाक्सका मोहम्मेद कुडुसले एक गोल फर्काए ।
खेलको १७औं मिनेटमा सलाहको गोलबाट लिभरपुलले सुरुवाती अग्रता लिन सफल भयो । उनले डिएगो जोटाको पासमा गोल गर्न सफल भएका थिए । २७औं मिनेटमा मोहम्मेद कुडुसले गोल गर्दै आयाक्सलाई खेलमा फर्काए । उनले स्टेभन वर्गवाइनको पासलाई सदुपयोग गरेका थिए ।
बराबरीतर्फ धकेलिएको खेलको अन्तिम समयमा जोएल मटिपले गोल गर्दै लिभरपुललाई यस सिजनको च्याम्पियन्स लिगमा पहिलो जित दिलाए । यस जितसँगै लिभरपुल २ खेलबाट ३ अंक जोडेर दोस्रो स्थानमा उक्लिएको छ ।
समान ३ अंक नै भएपनि एक खेल कम खेलेको नेपोली शीर्षमा छ । पराजित आयाक्सको पनि ३ अंक नै रहेपनि हेड टु हेडमा लिभरपुलभन्दा पछि छ । एक खेल कम खेलेको रेन्जर्स अंकविहीन छ ।
