एजेन्सी – इटालियन क्लब नापोली म्यानचेस्टर युनाइटेड सुपरस्टार क्रिस्टियानो रोनाल्डोसँग जोडिएको पछिल्लो क्लब हो। यस समर ट्रान्सफर विन्डो बन्द हुनु भन्दा अगाडी युनाइटेड छाड्ने प्रयासमा रहेका रोनाल्डोको नाम पछिल्लो समय नापोलीसँग जोडिएको हो।
रोनाल्डो नापोली जान सक्ने सम्भावना रहेको चर्चा चलिरहेका बेला नापोलीका डिफेन्डर मारियो रुईले पाँच पटक बालोन डी’ओर विजेतालाई नापोलीको ढोका खुला रहेको बताएका छन्। एक मिडियासँग कुराकानी गर्नेक्रममा रुईले रोनाल्डोका लागि नापोलीको ढोका खुला रहेको बताएका हुन्।
नापोलीको आधिकारिक रेडियोसँगको कुराकानीका क्रममा रुईले रोनाल्डोका लागि नापोलीको वातावरण धेरै राम्रो हुने बताए। नापोलीमा रोनाल्डोले धेरै राम्रो गर्न सक्ने उनी मान्छन्। त्यसक्रममा उनले रोनाल्डो जस्तो खेलाडीले जुन सुकै क्लबमा राम्रो गर्न सक्ने बताउन पनि छुटाएनन्।
“उनी जस्तो खेलाडीले जहाँ गए पनि राम्रो गर्न सक्छ्न्। जब उनी समर्थकहरुको साथ पाउँछन्, तब झनै राम्रो गर्छन्। उनलाई अनुकुल हुने वातावरण नापोलीमा छ। क्रिस्टियानो पोर्चुगलका लिजेन्ड हुन् र अन्य क्लबले जस्तै नापोलीले पनि उनलाई खुला हृदयले स्वागत गर्नेछ।”,रुईले भने।
रुईले रोनाल्डोलाई नजिकबाट चिनेको आधारमा आफूले रोनाल्डोले नापोलीमा राम्रो गर्न सक्ने बताएको दावी गरे। उनले भने,”म रोनाल्डोलाई राम्रोसँग चिन्छु। यसकै आधारमा म भन्न सक्छु नापोली उनका लागि धेरै राम्रो हुन सक्छ।”
युनाइटेड च्याम्पियन्स लिगमा छनौट हुन नसकेपछि रोनाल्डो क्लब परिवर्तन गर्ने सोचमा छन्। रोनाल्डोको नाम अहिले सम्म धेरै क्लबहरुसँग जोडिरहेको छ। अहिले सम्म रोनाल्डोको नाम जोडिएका क्लबहरुमा चेल्सी, पेरिस सेन्ट जर्मेन(पिएसजी), बायर्न म्युनिख आदी छन्।
