दुर्गम क्षेत्र मानिएको पश्चिम दैलेखको ठाटीकाँध गाउँपालिका–१ सिराडी र चामुण्डा बिन्द्रासैनी नगरपालिका–३ हाडाकोट जोड्ने ‘झोलुङ्गे पुल’ निर्माण हुने भएपछि स्थानीयवासीमा खुशी भएका छन् । वर्षाैंदेखि रामघाट खोलामा पुल नहुँदा तीन घण्टा लामो यात्रा गर्नुपर्ने बाध्यता भोग्दै आएका स्थानीयवासी पुल बन्ने भएपछि खुशी भएका हुन् ।
यो ठाउँमा पुल नहुँदा पहिले केही मान्छेलाई खोलाले बगाएको छ । सामान्य कामका लागि पनि खोला वारपार गर्नुपर्ने भएकाले बर्सातको समयमा खोला उर्लिएपछि वारपार गर्न निकै समस्या हुने गरेको स्थानीयवासी मेगे भण्डारीले बताए।
अब खोलामा ८० मिटर लामो पुल बन्ने भएपछि दुई स्थानीय तहका सयौँ नागरिक लाभान्वित हुने पुल निर्माण उपभोक्ता समितिका अध्यक्ष दीपक बुढाले बताए। चालू आर्थिक वर्षमा कर्णाली प्रदेश सरकारले पुल बनाउन रु ३५ लाख २२ हजार ९०८ बजेट दिएको छ ।
पुल निर्माणको काम शुरु भइसकेको अध्यक्ष बुढाले बताए। पुल निर्माणपछि २० जनाले प्रत्यक्षरुपमा रोजगारी पाएका छन्”, उनले भने, “अब वैशाख महिनादेखि पुल सञ्चालनमा आइसक्ने गरी काम थालनी गरिएको छ ।
करीब रु १८ लाख बराबरको सामग्री ढुवानी भइसकेको छ”, अध्यक्ष बुढाले भने, “पुलका लागि आवश्यक पर्ने लट्ठा ढुवानी केही दिनमै हुने छ। स्थानीयवासी अर्जुन शाहीले पुल निर्माण भएपछि ठाटीकाँध बजार जान पहिलेभन्दा अब तीन घण्टा छोटो बाटो हिँड्नु पर्ने बताएका छन्।
