काठमाडौँ – सिरहामा बसले किच्दा एक मोटरसाइकल चालकको ज्यान गएको छ। पूर्वपश्चिम राजमार्ग अन्तर्गत सिरहाकोे गोलबजनर नगरपालिका ४ स्थित जनकचोकमा यात्रुबाहक बसले किचेर एक युवकको ज्यान गएको हो। ज्यान गुमाउनेमा लहान १९ का मोहमद लुतफूर रहमान रहेका छन् ।
पूर्वबाट पश्चिमतर्फ गइरहेको ना ४ ख ४२६५ नम्बरको बसलाई उछिन्ने क्रममा रहमानले चलाइरहेको को ४ प २०९८ नम्बरको मोटरसाइल अर्को मोटरसाइकलसँग ठोक्किँदा दुर्घटना भएको र दुर्घटना पश्चात पल्टिँदा चालकलाई बसले किचेको बताइएको छ।
प्रहरीका अनुसार रहमान सवार मोटरसाइकलले बा ३१ ब ९८८३ नम्बरको मोटरसाइकललाई ठक्कर दिएको थियो। ठक्कर पश्चात सडकमा लडेका रहमानलाई उछिनेकै बसले किचेको इलाका प्रहरी कार्यालय गोलबजरले जनाएको छ।
यस्तै सोहि दुर्घटनामा परी बा ३१ ब ९८८३ नम्बरको मोटरसाइकल चालक पनि घाइते भएका छन्। घाइते हुनेमा आरजु कुमार राई रहेका छन्। उनको दाहिने खुट्टा भाँचिएको र गोलबजारस्थित भूमिजा हस्पिटमा उपचार भइरहेको बताइएको छ।
प्रहरीले ठक्कर दिने बस र चालकलाई नियन्त्रणमा लिएर अनुसन्धान शुरु गरेको छ।
