काठमाडौँ – काभ्रेपलाञ्चोक जिल्लामा बस दुर्घटना हुँदा बुधबार दुई दर्जन भन्दा बढी यात्रु घाइते भएका छन्। जिल्लाको कोशीपारीमा बस दुर्घटना हुँदा बुधबार दुई दर्जन भन्दा बढी यात्रु घाइते भएका हुन्।
रामेछापको गुराँसेबाट काठमाडौं आउँदै गरेको बा ४ ख ७१०२ नम्बरको बस काभ्रेको चौरीदेउरालीमा दुर्घटना भएको जिल्ला प्रहरी कार्यालय काभ्रेपलाञ्चोकले जनाएको छ।
सडकमा अर्को सवारीलाई साइड दिने क्रममा दुर्घटना भएको हुन सक्ने बताइएको छ। अहिले घटनास्थलमा उद्धार कार्य चलिरहेको छ। उद्धारमा स्थानीय तथा प्रहरी खटिएका छन्।
उद्धार भएका मध्ये ६ जनाको अवस्था गम्भीर रहेको बताइएको छ। गम्भीर घाइते भएकाहरुलाई चौरी देउराली गाउँपालिकाको गाडीमा तथा अन्य लाई बसमा धुलिखेल अस्पताल तर्फ पठाइएको काभ्रेपलाञ्चोकबाट प्रकाशित हुने अनलाइन पत्रिकाहरुले जनाएका छन्।
