काठमाडौँ : सिद्धार्थ बैंक (एसबिएल) नेपाल प्रिमियर लिग ( एनपिएल) को टोली विराटनगर किङ्सका स्टार विदेशी खेलाडी मार्टिन गप्टिल नेपाल आइपुगेका छन्।
बिहीबार काठमाडौं ओर्लिएका गप्टिलको आगमनको खबर टोलीले आफ्ना सामाजिक सञ्जालमार्फत सार्वजनिक गरेको हो।
विराटनगर किङ्सको मार्की खेलाडीका रूपमा नेपाली राष्ट्रिय टोलीका महत्वपूर्ण सदस्य सन्दीप लामिछाने छन्।
टोलीको नेतृत्व गर्ने जिम्मेवारी मुख्य प्रशिक्षक आयरल्यान्डका पूर्व क्रिकेटर केभिन ओ’ब्रायनलाई दिइएको छ भने सहायक प्रशिक्षकमा लाक्पा लामा र व्यवस्थापकका रूपमा विजय कुमार धिताल रहेका छन्। टोलीका निर्देशक दीपेन्द्र चौधरी हुन्।
नेपाल क्रिकेट संघ (क्यान) को आयोजनामा हुन लागेको एनपिएलमा आठ टोलीको सहभागिता रहनेछ। प्रतियोगिता मंसिर १५ गतेदेखि सुरु भई पुस ६ गतेसम्म सञ्चालन हुनेछ। उद्घाटन दिनमै विराटनगर किङ्सले जनकपुर बोल्ट्ससँग आफ्नो पहिलो खेल खेल्नेछ।