एजेन्सी – स्पेनिस क्लब रियल म्याड्रिडले युइएफए च्याम्पियन्स लिगको क्वाटरफाइनलको पहिलो लेगमा इंग्लिस क्लब चेल्सीलाई पराजित गरेको छ ।
रियलले घरेलु मैदानमा १० खेलाडीमा समेटिएको चेल्सीमाथि २–० को सहज जित हात पारेको हो । रियलको जितमा कप्तान करिम बेन्जेमा र मार्काे एसेन्सियोले गोल गरे ।
सान्टियागो बर्नबेउमा बुधबार राति भएको खेलको २१औं मिनेटमा बेन्जेमाको गोलबाट रियलले १–० को अग्रता लिन सफल भयो । उनले भिनिसियस जुनियरको पासमा गोल गर्न सफल भए ।
पहिलो हाफमा १–० ले पछि परेको पाहुना टोली चेल्सी दोस्रो हाफको शुरुमै १० खेलाडीमा समेटिन पुग्दा थप समस्यामा पर्न पुग्यो । ५९औं मिनेटमा बेच चिलवेल सिधैं रातो कार्ड खाँदै मैदानबाट बाहिरिए ।
७४औं मिनेटमा परिवर्तित खेलाडी मार्काे एसेन्सियोले गोल गर्दै रियललाई २–० को जित दिलाए । ७१औं मिनेटमा रोड्रिगोको स्थानमा मैदान छिरेका एसेन्सियोले चार मिनेटभित्रै भिनिको पासमा गोल गर्न सफल भएका थिए ।
यस जितसँगै सर्वाधिक १४ पटकको च्याम्पियन तथा साविकको विजेता रियलले सेमिफाइनल पुग्ने सम्भावना बलियो बनाएको छ ।
अब चेल्सीको मैदानमा १८ अप्रिलमा हुने खेलमा यही नतिजा कायम राख्न सके रियल सेमिफाइनलमा पुग्नेछ । चेल्सीलाई भने सेमिफाइनल पुग्न कम्तीमा ३–० को जितको खाँचो छ ।
