एजेन्सी – क्याटलान क्लब बार्सिलोनाका पोलिस स्टार रोबर्ट लेवान्डोस्कीले आउने सिजन अर्जेन्टिनी स्टार लियोनेल मेस्सीसँगै खेल्ने चाहना व्यक्त गरेका छन्। एक अन्तर्वार्ताका क्रममा लेवान्डोस्कीले आउने सिजन मेस्सीसँग खेल्ने आशा व्यक्त गरेका हुन्।
एक च्यारिटी कार्यक्रमका क्रममा लेवान्डोस्कीले मेस्सी बार्सिलोना फिर्ता हुँदा आफूहरु धेरै खुशी हुने बताए। बार्सिलोनामा मेस्सीको स्थान खालि नै रहेको पनि लेवान्डोस्कीले बताउन छुटाएनन्।
“मेस्सी बार्सिलोनाका हुन् र यदि उनी फर्किए भने त्यो अविश्वसनीय कुरा हुनेछ। हामीलाई थाहा छ उनको ठाउँ बार्सिलोनामा खालि छ। मलाई थाहा छैन के हुनेछ, तर मलाई आशा छ कि अर्को सिजन हामी सँगै खेल्न सक्छौं।”,लेवान्डोस्कीले भने।
मेस्सी सन् २०२१ मा पेरिस सेन्ट जर्मेन(पिएसजी) पुगेका थिए। आर्थिक समस्याका कारण बार्सिलोनाले मेस्सीलाई क्लबमा राख्न सम्भव नहुने भएपछि मेस्सीले विकल्पको रुपमा पिएसजी रोजेका थिए।
पहिलो सिजन खासै राम्रो प्रदर्शन गर्न नसकेपनि यस सिजन भने उनले पिएसजीका लागि राम्रै प्रदर्शन गरिरहेका छन्। पिएसजी र मेस्सी बीचको सम्झौता यहि सिजनको अन्त्यमा सकिँदैछ।
पिएसजी र मेस्सी बीच सम्झौता थपका विषयमा वार्ता जारी नै रहेपनि उनी अन्यत्र जाने चर्चा पनि सुरु भएको छ। मेस्सी बार्सिलोना फर्किन सक्ने सम्भावना पनि कायमै छ।
