एजेन्सी – रियल म्याड्रिडका डिफेन्डर डेभिड अलाबाले फिफा दि बेस्ट अवार्डमा रियलका सहकर्मी करिम बेन्जेमाको सट्टा लियोनेल मेस्सीलाई भोट गरेको विषयमा एक पटक पुनः स्पष्टिकरण दिएका छन्।
च्याम्पियन्स लिगको क्वाटरफाइनलमा प्रिमियर लिग क्लब चेल्सीको सामना गर्नु अगाडी पत्रकारहरुसँग कुराकानी गर्नेक्रममा अलाबाले बेन्जेमाको सट्टा मेस्सीलाई भोट गरेको विषयमा पुनः स्पष्टिकरण दिएका हुन्।
पत्रकारहरुसँग कुराकानी गर्नेक्रममा उनले फिफा बेस्टका लागि आफूले व्यक्तिगत रुपमा भन्दा पनि अष्ट्रियाको टोलीको रुपमा संयुक्त रुपमा मेस्सीलाई भोट गरेको स्पष्ट पारे।
“मैले एक्लै रोज्न मिल्दैन। हामी एउटा टोली हौं र सबैले राम्रोको लागि मतदान गर्न सक्छन्। टोलीको रुपमा नतिजा त्यो आयो। मलाई लाग्छ कि यो सबैले बुझेको हुनुपर्छ। नभए म फेरी स्पष्ट पार्छु।”,अलाबाले भने।
फिफा दि बेस्ट अवार्डमा अष्ट्रियाको प्रतिनिधिको रुपमा अलाबाले मेस्सीलाई भोट दिएका थिए। रियल म्याड्रिडका सहकर्मी बेन्जेमालाई भोट नदिएको भन्दै रियल समर्थकहरुले अलाबाको आलोचना गरेका थिए।
