एजेन्सी – सुरुवाती दुई गोलको अग्रता जोगाउन नसक्दा इंग्लिस प्रिमियर लिगको शीर्षस्थानमा रहेको आर्सनल घरेलु टोली लिभरपुलसँग बराबरीमा रोकिएको छ ।
आर्सनल र लिभरपुलले २–२ गोलको बराबरी खेल्दै अंक बाँडेका हुन् । लिभरपुलका गाव्रिएल मार्टिनेली र गाव्रिएल जेससले गोल गर्दा लिभरपुलका मोहम्मद सलाह र रोबर्टाे फिर्मिनोले बराबरी गोल फर्काए ।
एनफिल्डमा आइतबार राति भएको खेलमा आर्सनलले खेलको आठौं मिनेटमा मार्टिनेलीको गोलबाट अग्रता लिन सफल भएको थियो । बुकायो साका, मार्टिन ओडेगार्ड र मार्टिनेलीले लिभरपुलको डिफेन्स चिर्दै अघि बढाएको बल भर्जिल भान डाइकलाई लाग्दै मार्टिनेलीसम्म पुग्दा उनले सहजै फिनिस गरे ।
२८औं मिनेटमा आर्सनलले अग्रता दोब्बर बनायो । गाब्रिएल जेससले मार्टिनेलीकै पासमा गोल गर्न सफल भए । तर, त्यो अग्रतालाई आर्सनलले जोगाउन सकेन । ४२औं मिनेटमा सलाहले गोल गर्दे लिभरपुललाई २–१ को स्थितिमा ल्याउदै टोलीलाई खेलमा फर्काउने संकेत दिए ।
५४औं मिनेटमा सलाह पेनाल्टीमा चुक्दा लिभरपुल बराबरीबाट चुक्यो । रोव होल्डिङले पेनाल्टी बक्समा डिएगो जोटालाई फउल गेपछि प्राप्त पेनाल्टीमा सलाहको प्रहार बाहिरियो ।
त्सपछि निर्धारित समयको खेल सकिन तीन मिनेट बाँकी रहँदा परिवर्तित खेलाडी फिर्मिनोले गोल गर्दै लिभरपुललाई हारबाट जोगाँउदा आर्सनललाई जितबाट वञ्चित गराए । ७८औं मिनेटमा फविन्होको स्थानमा मैदान छिरेका फिर्मिनाले ट्रेन्ट एलेक्सान्डर आर्नाेल्डको पासमा गोल गर्न सफल भएका थिए ।
यस बराबरीसँगै शीर्षस्थानमा रहेको आर्सनलले आफ्नो अग्रता थप बढाउने मौका गुमाएको छ । आर्सनलले शीर्षस्थानमा ६ अंकको अग्रता कायम गरेको छ ।
आर्सनलको ३० खेलबाट ७३ अंक रहँदा एक खेल कम खेलेको म्यानचेस्टर सिटीको ६७ अंक छ । लिभरपुल २९ खेलबाट ४४ अंक जोडेर आठौं स्थानमा छ ।
