एजेन्सी – फ्रेन्च लिग वानको शीर्षस्थानमा रहेको पेरिस सेन्ट जर्मेन (पिएसजी) ले लिग वानमा अर्काे हार बेहोरेको छ । पिएसजी घरेलु मैदानमै लियोनसँग १–० ले पराजित भएको हो ।
पिएसजीलाई हार चखाउन दोस्रो हाफमा ब्राडले बारकोलाले गरेको गोल नै निर्णायक बन्यो । उनले ५६औं मिनेटमा साइल कुमबेडीको पासमा गोल गर्न सफल भएका थिए । त्यसअघि ३९औं मिनेटमा एलेहान्द्रे लाकाजेट पेनाल्टीमा चुक्दा लियोन अग्रता लिनबाटै चुकेको थियो ।
पार्क डेस प्रिन्सेसमा आइतबार राति भएको खेलमा घरेलु टोली पिएसजीले बल पोसेसन राख्दै पाहुना टोलीमाथि दवाव बढाएपनि फिनिसिङमा चुक्दा लिग वानमा लगातार दोस्रो हार बेहोर्न पुग्यो । पिएसजी यसअघि रेनेससँग २–० ले पराजित भएको थियो ।
यस जितसँगै लियोन २९ खेलबाट ४४ अंक जोडेर नवां स्थानमा उक्लिदा पराजित पिएसजीले शीर्ष स्थानमा आफ्नो अग्रता बढाउनबाट चुकेको छ । शीर्षस्थानमा रहेको पिएसजीको २९ खेलबाट ६६ अंक रहँदा दोस्रो स्थानको लेन्सभन्दा ६ अंकले अघि छ ।
