एजेन्सी – प्रिमियर लिग लिडर आर्सनलले लालिगा लिडर बार्सिलोनाका एक स्टार खेलाडी भित्र्याउने योजना बनाएको छ। विभिन्न खेल मिडियाहरुका अनुसार आर्सनलले बार्सिलोनाका ब्राजी`ब्राजिलियन विंगर राफिन्हालाई भित्र्याउने योजना बनाएको हो।
आर्सनलले राफिन्हालाई आउने समर ट्रान्सफर विन्डोमै भित्र्याउने योजना बनाएको विभिन्न बेलायती मिडियाहरुले जनाएका छन्। एक उच्च श्रोतको हवाला दिँदै फुटबल इनसाइडरले राफिन्हालाई भित्र्याउन आर्सनल सकारात्मक रहेको र उचित कदम चाल्न तयार रहेको आफ्नो समाचारमा उल्लेख गरेको छ।
आर्सनल २६ वर्षीय ब्राजिलियनका दीर्घकालीन प्रशंसक रहेको बताइन्छ। आर्सनलले राफिन्हालाई लामो समय देखि पछ्याइरहेको फुटबल इनसाइडरको दावी छ। बार्सिलोनाले राफिन्हालाई आउने समर ट्रान्सफर विन्डोमा बिक्रीमा राखेको खण्डमा मौकाको फाइदा उठाउने योजना आर्सनलले बनाएको छ।
बार्सिलोनाले आर्थिक रूपमा संघर्ष जारी राखेको छ र आउने समर ट्रान्सफर विन्डोमा विभिन्न खेलाडीहरुलाई बिक्री गर्ने योजना बनाएको छ। क्लबका केहि खेलाडी बिक्री नगरी नयाँ खेलाडी दर्ता गर्न सक्ने अवस्थामा बार्सिलोना छैन। सो कारणले गर्दा पनि बार्सिलोनाले राफिन्हालाई बिक्री गर्न सक्छ।
राफिन्हा यहि सिजन प्रिमियर लिग क्लब लिड्स युनाइटेडबाट बार्सिलोना आइपुगेका हुन्। बार्सिलोना आएपछि उनले ठिक-ठाक प्रदर्शन गरिरहेका छन्। उनले यस सिजन बार्साका लागि कुल ३८ खेल खेल्दा ९ गोल गरेका छन् भने ९ नै असिस्ट पनि दिएका छन्।
गत समर ट्रान्सफर विन्डोमा पनि आर्सनलले राफिन्हामा चासो देखाएको थियो। तर प्रिमियर लिगका चेल्सी, आर्सनल जस्ता क्लबहरुको चासोलाई नजरअन्दाज गर्दै खेलाडीले बार्सिलोना आवद्ध हुने निर्णय गरेका थिए।
