एजेन्सी – इंग्लिस प्रिमियर लिगमा आज (शनिबार) विभिन्न सात खेलमा प्रतिस्पर्धा हुँदा उपाधि दौडमा रहेको म्यानचेस्टर सिटीले घरेलु मैदानमा इंग्लिस क्लब लिभरपुलको आतिथ्यता गर्दैछ ।
यो खेल इतिहाद स्टेडियममा नेपाली समयअनुसार साँझ ५ः१५ बजे हुनेछ । अन्तर्राष्ट्रिय विश्रामपछि क्लब फुटबल शुरु हुन लागेको हो ।
उपाधि होडलाई जीवित राख्न सिटीलाई लिभरपुलविरुद्धको खेलमा जितको खाँचो छ । लिभरपुललाई हराउन सके सिटीले शीर्षस्थानमा रहेको आर्सनलसँगको अंक दुरी ५ मा छोट्याउने छ । बराबरी या हारले अंक दुरी सिटीको उपाधि यात्रामा धक्का लाग्नेछ ।
लिभरपुलविरुद्ध सिटीलाई आफ्नो मुख्य फरवार्ड एर्लिङ ब्राउट हालान्ड र फिल फोडेनको अभाव खड्कन सक्नेछ । तर, मुख्य प्रशिक्षक पेप गुआर्डीओलाले हालान्डले खेल्ने सम्भावना रहेको बताएको छ ।
यसबाहेक टोलीसँग रियाद महारेज, जुलियन अल्भारेज, ज्याक ग्रेलिस, बर्नाडो सिल्भा, बेभिन डि ब्रुएना, रोड्री, नाथन एके, रुवेन डियास र गोलरक्षक एडर्सन मोराएस रहेका छन् ।
यता, लिभरपुल पनि घरेलु टोली सिटीलाई हराएर अंक तालिका सुधार गर्ने योजनामा हुनेछ । लिभरपुल ४२ अंक जोडेर छैटौं स्थानमा रहेको छ ।
टोलीसँग मोहम्मद सलाहसँगै कोडी गाक्पो, डार्विन नुनेज, जोर्डन हेन्डरसन, फाविन्हो, हार्भे एलिओट, एन्ड्रिउ रोबर्टसन, भर्जिल भान डाइक, ट्रेन्ट एलेक्सान्डर आर्नाेल्ड र गोलरक्षक एलिसन बेकर रहेका छन् । लुइस डियाजे पनि खेल्ने सम्भावना छ ।
यि दुई टोलीबीचको पछिल्लो ३६ खेलमा लिभरपुल १५ खेलमा विजयी भएको छ । सिटीले ९ खेल जित्दा १२ खेल बराबरीमा सकिएको छ । पछिल्लोपटक इएफएल कपमा सिटी ३–२ ले वजयी हुँदा त्यसभन्दा अघि लिभरपुलले प्रिमियर लिगा १–० को जित निकालेको थियो ।
