एजेन्सी – इटालियन सिरी ‘ए’ को शीर्ष दौडमा रहेको एसी मिलानले लज्जास्पद हार बेहोरेको छ । मिलान शीर्ष दौडमै रहेको लाजियोसँग ४–० को भारी अन्तरले पराजित भएको हो ।
लाजियोको जितमा सेर्गेज मिलिन्कोभिच साभिक, माटिया जाकाग्नी, लुइस अल्बर्टाे र फिलिप एन्डरसनले गोल गरे । पहिलो र दोस्रो हाफमा समान दुई गोल भएको थियो ।
स्टेडियो ओलम्पिको रोमामा मंगलबार राति भएको खेलको चौथो मिनेटमा सेर्गेज मिलिन्कोभिच साभिकले गोल गर्दै लाजियोलाई १–० को अग्रता दिलाए । उनले माटिया जाकाग्नीको पासलाई सदुपयोग गरेका थिए । ३८औं मिनेटमा माटिया जाकाग्नीले गोल गर्दै लाजियोको अग्रता दोब्बर पारे ।
६७औं मिनेटमा लुइस अल्बर्टाेले पेनाल्टीमा गोल गर्दै लाजियोलाई सहज जिततर्फ अघि बढाए । त्यसपछि ७५औं मिनेटमा फिलिप एन्डरसनले लुइस अल्बर्टाेको पासमा गोल गर्दै मिलानलाई लज्जास्पद हार चखाए ।
यस जितसँगै लाजियो १९ खेलबाट ३७ अंक जोडेर तेस्रो स्थानमा उक्लिएको छ । समान ३७ अंक नै रहेपनि इन्टर मिलान र रोमा गोलअन्तरमा चौथो र पाँचौ स्थानमा छ । पराजित मिलान ३८ अंक जोडेर दोस्रो स्थानमा रहेको छ ।
