एजेन्सी – लामो समय देखि प्रिमियर लिग क्लब म्यानचेस्टर युनाइटेडको नजरमा रहेका खेलाडीलाई लालिगा क्लब रियल म्याड्रिडले हाइज्याक गर्ने भएको छ। विभिन्न खेल मिडियाहरुका अनुसार युनाइटेडका टार्गेट भिक्टर ओसिमेनलाई रियलले हाइज्याक गर्ने भएको हो।
फ्रेन्च क्लब लिलबाट नापोली आइपुगेपछि उच्च प्रदर्शन गरिरहेका भिक्टर ओसिमेनका लागि रियल उच्च मूल्य खर्च गर्न तयार रहेको विभिन्न खेल मिडियाहरुले जनाएका छन्।
सिजन भर उच्च प्रदर्शन गरेका कारण गत सिजन उनी सिरी ‘ए’को उत्कृष्ट युवा खेलाडी घोषित भएका थिए। गत सिजन जस्तै यस सिजन पनि उनी उच्च लयमा रहेका छन्।
सन् २०२२-२३ को सिजन सुरु भए देखि नै उनले निरन्तर नापोलीका लागि उच्च प्रदर्शन गर्न सकिरहेका छन्। उनलाई उच्च प्रदर्शनमा नापोलीले सिरी ‘ए’को शिर्ष स्थानमा कब्जा जमाइरहेको छ।
इटालियन लिगमा उनले १५ खेलमा १३ गोल गरिसकेका छन्। साथै उनको नाममा ३ असिस्ट पनि छ। डन बालोनका अनुसार, रियल म्याड्रिडका अध्यक्ष फ्लोरेन्टिनो पेरेज आगामी समर ट्रान्सफर विन्डोमा ओसिमहेनलाई अनुबन्ध गर्न चाहन्छन्।
रियल उनका लागि ६० मिलियन युरोको प्रस्ताव पठाउने तयारीमा रहेको बताइएको छ। यधपी उनका लागि नापोलीले ८० मिलियन भन्दा कम मूल्यमा नमान्ने अनुमान लगाउन सकिन्छ। रियल म्याड्रिडले ओसिमहेनलाई करिम बेन्जेमाको स्थान लिन सक्ने खेलाडीको रुपमा पहिचान गरेको स्पेनिस मिडियाहरुले जनाएका छन्।
