हालै मात्र फुटबल जगतका सुपरस्टार खेलाडी क्रिस्टियानो रोनाल्डोलाई अनुबन्ध गरेको साउदी अरेबियन क्लब अल-नासरको नजर अब प्रिमियर लिग स्टार माथि परेको छ। आफ्नो रक्षात्मक पङ्क्ति बलियो बनाउने प्रयासमा रहेको अल-नासर हाल प्रिमियर लिगमा खेलिरहेका गोलकिपरलाई अनुबन्ध गर्न चाहन्छ।
रेलेभोका अनुसार हाल साउदी क्लबको नजर स्पेनिस गोलकिपर भिसेन्टे गुआइटा माथि परेको छ, जो हाल प्रिमियर लिग क्लब क्रिस्टल प्यालेसबाट खेलिरहेका छन्। ३६ वर्षीय गोलकिपरले हाल साउदी क्लबबाट ६ महिनाको प्रस्ताव प्राप्त गरिसकेका छन्, जुन उनको प्रदर्शनलाई मध्यनजर गर्दै थप गर्न सकिनेछ।
अल-नासरले उनलाई छोटो समयका लागि भएपनि ३ मिलियन पारिश्रमिकका साथै केही प्रदर्शन सम्बन्धित बोनस समेत दिने प्रस्ताव गरेको छ, जसले पासा साउदी पक्षतर्फ पल्टाउने अनुमान गरिएको छ। वर्तमान गोलकिपर डेभिड ओस्पिना चोटका कारण बाँकी सिजन खेल्न नसक्ने भएपछि अल-नासर गोलकिपरको खोजीमा रहेको छ।
गुआइटाका साथै अल-नासरले रोनाल्डोका पूर्व सहकर्मी कलर नाभास माथि पनि नजर गाडेको विभिन्न रिपोर्टले जनाएका छन्। नाभास फ्रेन्च क्लब पेरिस सेन्ट जर्मेन (पीएसजी) मा लगातार खेल समयका संघर्ष गरिरहेका छन्।
