एजेन्सी – अर्जेन्टिनाका विश्वकप विजेता कप्तान लियोनेल मेस्सी २०२२ को बीबीसी स्पोर्ट पर्सनालिटीको वल्ड स्पोर्ट्स स्टार अफ द इयर घोषित भएका छन् ।
३५ वर्षीय मेस्सीले अर्जेन्टिनालाई ३६ वर्षपछि पहिलो पटक विश्वकप उपाधि दिलाएका थिए । फ्रान्सेली क्लब पेरिस सेन्ट जर्मेन (पिएसजी) का फरवार्डले आफ्नो पाँचौं विश्वकपमा सात गोल गर्दै गोल्डेन बलसमेत जित्न सफल भएका थिए ।
बार्सिलोना पुर्व स्टार मेस्सीले विश्वकपको फाइनलमा दुई गोलसहित टाइब्रेकरमा पनि गोल गर्न सफल भएपछि अर्जेन्टिनाले फ्रान्सलाई पेनाल्टीमा ४–२ ले हराएर उपाधि जित्न सफल भएको थियो । रोमाञ्चक र प्रतिस्पर्धात्मक खेलको निर्धारित समयमा २–२ तथा अतिरिक्त समयमा ३–३ गोलको बराबरीपछि खेल टाइब्रेकरमा लम्बिएको थियो ।
विश्वकपको उपाधि जितेसँगै मेस्सीले फुटबलको सबैभन्दा ठूलो ट्रफीलाई आफ्नो करिअरमा थपेका छन् । मेस्सीले सात बालोन डी’ओर, चार च्याम्पियन्स लिग, एक कोपा अमेरिका, १० ला लिगा, एक फ्रेन्च लिग वान जितेका छन् ।
मेस्सीले व्यवसायिक करिअरमा ७९३ गोल गरेका छन् । पिएसजीबाट मेस्सीले फ्रेन्च लिग वान जितिसकेका मेस्सीले यो सिजन १९ खेलमा १२ गोल र १४ असिस्ट प्रदान गरिसकेका छन् ।
मेस्सीले आइतवार विश्वकपको उपाधि उचालेपछि भने, ‘यो सानो हुँदा सबैको सपना हो । म सबै कुरा हासिल गर्न भाग्यशाली छु र मैले के गुमाएको थिए । मैले यहाँ पाएको छु ।’ मेस्सी सन् २०२६ मा हुने विश्वकपमा ३९ वर्ष पुग्नेछन् । उनले हालै राष्ट्रिय टोलीबाट सन्यास लिने योजना बनाएका छैनन् । उनले विश्व च्याम्पियनको रुपमा अझै खेलिरहने बताएका छन् ।
बीबीसी वर्ल्ड स्पोर्ट स्टार अफ द इयर एक प्यानलद्वारा वर्षको अवधिमा विश्व मञ्चमा सबैभन्दा उल्लेखनीय खेलकुद सफलता हासिल गर्ने खेलाडीलाई यो अवार्ड प्रदान गर्ने गर्दछ । गत वर्ष आयरिश जकी रचेल ब्ल्याकमोरले यो अवार्ड जितेका थिए ।
