एजेन्सी – अर्जेन्टिनाका कप्तान लियोनेल मेस्सीले क्रिस्टियानो रोनाल्डोको इन्स्टाग्राम रेकर्ड तोडेका छन्। कतारमा विश्वकप जितेपछि मेस्सीले इन्स्टाग्राममा पोस्ट गरेको तस्विरले रोनाल्डोको रेकर्ड तोडेको हो।
आइतबार राति विश्वकपको फाइनलमा अर्जेन्टिनाले फ्रान्सलाई पराजित गर्यो। मेस्सीले उच्च प्रदर्शन गरेपनि फ्रान्सका किलियन एम्बाप्पेले लगातार गोल फर्काउँदा खेल टाइब्रेकर सम्म गएको थियो। तर टाइब्रेकरमा अर्जेन्टिना विजयी भयो।
अर्जेन्टिनाले विश्वकप जितेपछि मेस्सीले विश्वकप ट्रफी सहितको तस्विर इन्स्टाग्राममा सार्वजनिक गरेका थिए। मेस्सीको सो तस्विर क्षणभरमै भाइरल भयो। मेस्सीको सो तस्विर निरन्तर लाइक गरिएका छन्।
अहिले सम्म सो तस्विरमा साढे ५२ मिलियन लाइक आइसकेको छ भने लाइक निरन्तर बढ्ने क्रममा छ। साथै सो तस्विरमा अहिले सम्म १५ लाख भन्दा बढी कमेन्ट आइसकेका छन्।
यससँगै मेस्सीको सो तस्विर सबै भन्दा बढी लाइक गरिएको खेलाडीको तस्विर बनेको छ। यस भन्दा अगाडी सो रेकर्ड रोनाल्डोले राखका थिए। मेस्सी र रोनाल्डो दुवै चेस खेल्दै गरेको तस्विर रोनाल्डो र मेस्सी दुवैले आफ्नो इन्स्टाग्राममा राखेका थिए। तर रोनाल्डोले राखेको तस्विरले ४२ मिलियन लाइक पाएको थियो।
