एजेन्सी – म्यानचेस्टर युनाइटेड तथा इंग्ल्याण्डका पूर्व खेलाडी वायन रुनीले क्रिस्टियानो रोनाल्डो भन्दा लियोनेल मेस्सी उत्कृष्ट खेलाडी रहेको दोहोर्याएका छन्। विश्वकपको मुखमा एक मिडियालाई अन्तर्वार्ता दिनेक्रममा रुनीले रोनाल्डो भन्दा मेस्सी उत्कृष्ट र पूर्ण खेलाडी रहेको दोहोर्याएका हुन्।
यस भन्दा अगाडी नै मेस्सी रोनाल्डो भन्दा उत्कृष्ट खेलाडी रहेको बताउँदै आएका रुनीले डिएगो म्याराडोना भन्दा पनि मेस्सी उत्कृष्ट खेलाडी रहेको बताए। म्याराडोना भन्दा मेस्सी राम्रो खेलाडी रहेको स्पष्टसँग बुझ्न सकिने उनको भनाई छ।
“मेस्सी र रोनाल्डोलाई लिएर सबैको फरक फरक धारणा छ। तर मैले यस अगाडी नै धेरै पटक भनिसकेको छु – मेस्सी रोनाल्डो भन्दा धेरै उत्कृष्ट र पूर्ण खेलाडी हुन्। मैले डिएगो म्याराडोनाका धेरै भिडियोहरू हेरेको छु। उनी मेस्सी जस्तै खेलाडी थिए। तर मेस्सीलाई मैले म्याराडोना भन्दा राम्रा खेलाडी पाएको छु। मेस्सीसँग सबै कुरा छ – जसरी मेस्सी बललाई नियन्त्रण गर्छन्, ड्रिब्लिङ गर्छन्, असिस्ट दिन्छन्। मेस्सीका यी सबै गुण धेरै राम्रा छन्। तर रोनाल्डो धेरै राम्रा गोलकर्ता हुन्।”,रुनीले भने।
रुनीले मेस्सी र रोनाल्डो मध्ये एकले विश्वकप जिते छुट्टै कथा लेखिने पनि बताए। अर्जेन्टिनाका केहि खेलाडीहरुले मेस्सीका लागि विश्वकप जित्ने बताइरहेको उल्लेख गर्दै रुनीले त्यसले अर्जेन्टिनालाई केहि दबाबमा पार्ने बताए।
उनले भने,”यदि मेस्सी वा रोनाल्डो मध्ये कसैले विश्वकप जिते फुटबलको इतिहाँसमा छुट्टै कथा लेखिनेछ। मैले अर्जेन्टिनाका केही खेलाडीहरूले मेस्सीका लागि यो जित्न चाहन्छन् भनी सुनेको छु। यो पागलपन हो। यसले उनीहरु माथि दबाब मात्र थपिन सक्छ भन्ने मलाई लाग्छ।”
