एजेन्सी – वेस्ट ह्याम युनाइटेडका पूर्व गोलकिपर रोबर्ट ग्रीनको भनाईलाई मान्ने हो भने पोर्चुगिज स्टार क्रिस्टियानो रोनाल्डोले म्यानचेस्टर युनाइटेडका लागि अन्तिम खेल खेलिसकेका छन्। एक मिडियासँग कुराकानी गर्नेक्रममा ग्रीनले रोनाल्डोले युनाइटेडका लागि अन्तिम खेल खेलिसकेको बताएका हुन्।
बीबीसी रेडियो ५ लाइभमा बोल्दै ग्रीनले म्यानचेस्टर युनाइटेडका लागि रोनाल्डोले फेरी खेल्छन् भन्ने कुरामा शंका रहेको बताए। युनाइटेड र रोनाल्डो बीच एक प्रकारको सम्बन्ध विच्छेद भइसकेको उनको भनाई छ।
सम्बन्धमा ठूलो दरार आएपनि युनाइटेडका प्रशिक्षक एरिक टेन ह्यागले सिजनको सुरुवात देखि नै राम्रो क्षणलाई कुरेपनि रोनाल्डोले सम्भावनाहरुलाई भंग गरेको ग्रीनले बताए।
“मलाई शंका छ कि उनी म्यानचेस्टर युनाइटेडबाट फेरि खेल्छन्। रोनाल्डोले युनाइटेडका लागि अन्तिम खेल खेलिसकेका छन् भन्ने मलाई लाग्छ। यो एक गडबड सम्बन्ध विच्छेद हो तर टेन ह्यागले एक क्षणको लागि पर्खिएका थिए।”,ग्रीनले भने।
म्यानचेस्टर युनाइटेडका पूर्व महान खेलाडी रियो फर्डिनान्डले पनि आफ्नो पूर्व टोलीका सहकर्मीको वर्तमान अवस्थाको बारेमा आफ्नो धारणा साझा गरे। युनाइटेड र रोनाल्डो बीच संवादमा समस्या भएको हुन सक्ने फर्डिनान्डको भनाई छ।
केहि दिन अगाडी रोनाल्डो बीच खेलमै मैदान छाडेर हिँडेका थिए। त्यसयता रोनाल्डो निरन्तर चर्चामा छन्। सो व्यवहारका कारण युनाइटेडले रोनाल्डोलाई चेल्सी विरुद्धको खेलमा टोली बाहिर राखेको थियो।
