एजेन्सी – च्याम्पियन्स लिगको मुख्य दाबेदार मध्ये एक रहेको प्रिमियर लिग च्याम्पियन्स म्यानचेस्टर सिटीले आज जर्मन क्लब बोरुसिया डर्टमण्ड विरुद्ध खेल्दैछ। समूह ‘जी’ को शिर्ष स्थानमा रहेको सिटीले दोस्रो स्थानमा रहेको डर्टमण्डको सामना गर्न लागेको हो।
म्यानचेस्टर सिटीको घरेलु मैदानमा हुने खेलमा दुवै टोली जित निकालेर अर्को चरणमा प्रवेश गर्ने सम्भावनालाई बलियो बनाउने दाउमा हुनेछन्। च्याम्पियन्स लिगको समूहचरणको पहिलो खेलमा दुवै टोलीले जित निकालेका थिए। समूहचरणको पहिलो खेलमा सिटीले सेभियालाई ४-० को गोल अन्तरले पराजित गरेको थियो भने डर्टमण्डले कोपेनहेगनलाई ३-० को गोल अन्तरले पराजित गरेको थियो।
कोपेनहेगन विरुद्ध डर्टमण्डको जितमा थोरगन हाजार्डले खेलको बीचमै मैदान छाड्न परेको थियो। तर बेल्जियमका मिडफिल्डर म्यानचेस्टर यात्रा गर्ने टोलीमा समावेश छन्। यधपी उनले खेल्ने नखेल्ने बारे भने कुनै स्पष्ट जानकारी बाहिर आएको छैन। जर्मन क्लबको घाइते हुने खेलाडीहरुको सूची लामो छ र यसमा ग्रेगर कोबेल, सेबास्टियन हलर, महमूद दाहौद, जेमी बाइनो-गिटन्स र माटेउ मोरे छन्। डोनेल मालेन र करिम अडेमी खेल्ने-नखेल्ने पनि टुंगो छैन।
यस्तै सिटीका डिफेन्डर एमेरिक लापोर्टे भने लामो समय पछि आजको खेलमा फिर्ता हुन सक्ने केहि सम्भावना छ। यस सिजनका कुनै पनि खेल नखेलेका उनी चोटमुक्त भइसकेका छन्। यधपी उनलाई पेप गार्डियोलाले यति छिट्टै प्रयोग गर्छन् भन्ने नै चाहिँ छैन। डर्टमण्ड विरुद्धको खेलका लागि जोन स्टोन्स उपलब्ध भएपनि काइल वाकर भने मैदान बाहिर नै रहनेछन्।
सिटी र डर्टमण्ड बीचको खेल सिटीको घरेलु मैदानमा आज राति नेपाली समय अनुसार १२ बजेर ४५ मिनेटमा शुरु हुनेछ। खेल भारतीय च्यानल सोनी टेन २ मा हेर्न सकिनेछ।
