एजेन्सी – पछिल्ला वर्षहरुमा क्याटलान क्लब बार्सिलोनाले च्याम्पियन्स लिगमा यति कुनै क्लबसँग बढी पराजित भएको छ भने त्यो बायर्न म्युनिख हो। गत सिजन मात्रै बार्सिलोना र बायर्न बीच च्याम्पियन्स लिगको समूहचरणमा भेट भएको थियो। त्यसबेला दुवै खेलमा बार्सिलोना ३-०, ३-० को गोल अन्तरले पराजित भएको थियो।
दुवै खेलमा बार्सिलोनाले एक गोल पनि गर्न सकेको थिएन। त्यति बेला रोबर्ट लेवान्डोस्कीले उच्च प्रदर्शन गरेका थिए। तर अहिले अवस्था बदलिएको छ बार्सिलोना विरुद्ध गोल पछि गोल गर्ने तीनै रोबर्ट लेवान्डोस्की अहिले बार्सिलोनामा छन्।
आजको खेल लेवान्डोस्कीका लागि मात्र नभई बायर्नका खेलाडीहरुका लागि पनि अनौठो हुनेछ। लगातार आठ वर्ष सम्म सँगै रहेका लेवान्डोस्कीको सामना गर्न पक्कै पनि बायर्नका खेलाडीहरुका लागि सहज हुने छैन।
यसै बीच बायर्नका थोमस मुलरले क्लबमा नयाँ खेलाडी साडियो मानेले झुक्किएर लेवान्डोस्कीलाई बल पास नगर्न आग्रह गरेको बताएका छन्। बार्सिलोनाको सामना गर्नु अगाडी आयोजित पत्रकार सम्मेलनमा बोल्दै मुलरले खेलको क्रममा गल्ती नगर्न र बल लेवान्डोस्कीलाई पास नगर्न मानेले ठट्टा गर्दै आग्रह गरेका हुन्।
“साडियोले मलाई खेलको क्रममा गल्ती नगर्न र बल लेवान्डोस्कीलाई पास नगर्न भनिरहेका छन्। हामीले बार्सिलोना विरुद्ध हाम्रो खेल खेल्नुपर्नेछ र लेवीमा कम ध्यान दिनुपर्नेछ।”,मुलरले भने।
पत्रकार सम्मेलनका क्रममा मुलरले क्लबमा एक जना मात्र स्ट्राइकर नरहेको बताए। उनले क्लबमा बहुमुखी खेलाडीहरू रहेको र को मुख्य स्ट्राइकर हो भन्ने विपक्षी खेलाडीलाई थाहा नै नहुने गरी खेल्ने दावी गरे।
