एजेन्सी – साविक उपविजेता इंग्लिस क्लब लिभरपुलले नयाँ सिजनको युइएफए च्याम्पियन्स लिगको समूह चरणको पहिलो खेलमै लज्जास्पद हार बेहोरेको छ । लिभरपुलले घरेलु टोली नेपोलीसँग ४–१ के लज्जास्पद हार बेहोरेको हो ।
डिएगो अर्मान्डो म्याराडोना स्टेडियममा बुधबार राति भएको खेलमा घरेलु टोलीको जितमा पिओटर जिलेन्स्कीले दुई तथा आन्द्रे फ्रान्क जाम्वो एनगुइसा र जियोभानी सिमिओनले समान एक गोल गरे । लिभरपुलका लुइस डियासले एक गोल फर्काए ।
खेलको पाँचौं मिनेटमा पिओटर जिलेन्स्कीले पेनाल्टीमा गोल गर्दै नेपोलीलाई सुरुवाती अग्रता दिलाए । १८औं मिनेटमा भिक्टर ओसिमहेम पेनाल्टीमा चुक्दा नेपोली अग्रता दोब्बर पार्नबाट चुक्यो । ३१औं मिनेटमा आन्द्रे फ्रान्क जाम्वो एनगुइसाले गोल गर्दै नेपोलीलाई २–० ले अघि बढाए ।
४४औं मिनेटमा जियोभानी सिमिओनले गोल गरेपछि नेपोली पहिलो हाफमै ३–० को आरामदायी स्थितिमा अघि बढ्यो । ४७औं मिनेटमा पिओटर जिलेन्स्कीले व्यक्तिगत दोस्रो तथा टोलीका लागि चौथो गोल गर्दै नेपोलीलाई ४–० को आरामदायी अग्रता दिलाए ।
४९औं मिनेटमा लुइस डियासले गोल गर्दै टोलीलाई खेलमा फर्कने संकेत दिएपनि त्यसपछि थप गोल निस्कन नसक्दा लिभरपुल पहिलो खेलमै लज्जास्पद हार बेहोर्न पुग्यो । यही समूह ‘ए’ को अर्काे खेलमा डच क्लब आयाक्सले स्कटिस क्लब रेन्जर्सलाई ४–० ले पराजि तगर्दै विजयी सुरुवात गरेको छ ।
आयाक्सको जितमा एड्सन अल्भारेज, स्टेभन वर्गहुइस, मोहम्मेद कुडुस र स्टेभन वर्गवाइनले गोल गरे । यस नतिजापछि आयाक्स ३ अंक जोडेरमा समूहमा शीर्षस्थानमा रहेको छ । समान ३ अंक नै रहेपनि नेपोली गोलअन्तरमा दोस्रो स्थानमा छ । अंकविहीन लिभरपुल तेस्रो तथा रेन्जर्स पुछारमा छ ।
