एजेन्सी – रियल म्याड्रिडका सुपरस्टार टोनी क्रुसले पूर्व सहकर्मी क्रिस्टियानो रोनाल्डोको खुलेर प्रशंसा गरेका छन्। एक पोडकास्टका क्रममा क्रुसले रोनाल्डो खुलेर प्रशंसा गरेका हुन्।
रियल म्याड्रिडमा केहि वर्ष रोनाल्डोसँगै खेलेका क्रुसका अनुसार रोनाल्डो जति मिहिनेत गर्छन्, त्यति सायदै कसैले गर्छन्। निरन्तरको मिहिनेतले नै रोनाल्डो उत्कृष्ट खेलाडी बन्न सकेको क्रुसले बताए। नामकै कारण रोनाल्डो शिर्ष स्थानमा नपुगेको क्रुसको भनाई छ।
“नाम क्रिस्टियानो रोनाल्डो भएका कारण शिर्ष स्थानमा पुगेका होइनन्। आफ्नो मिहिनेतले रोनाल्डो शिर्ष स्थानमा पुगेका हुन्। उनले जति मिहिनेत त सायदै कसैले गर्छन्। कडा मिहिनेतमा उनले अविश्वसनीय समय खर्च गर्छन्।”,क्रुस भन्छन्।
रोनाल्डोले सन् २००९ देखि २०१८ सम्म रियल म्याड्रिडबाट फुटबल खेलेका थिए। रियलबाट फुटबल खेल्दा रोनाल्डो कयौं रेकर्ड बनाएका थिए भने उनले कयौं उपाधि पनि जितेका थिए।
रियलका लागि ९ वर्ष फुटबल खेल्दा रोनाल्डोले दुई ला लिगा उपाधि र चार च्याम्पियन्स लिग ट्रफी जितेका थिए। रियलका लागे उनले ४ सय ३८ खेलमा ४ सय ५० गोल गरेका थिए। त्यस्तै रोनाल्डोले करियरका पाँच बालोन डी’ओर मध्ये चार रियलमा हुँदा जितेका थिए।
