एजेन्सी – युरोपेली च्याम्पियन रियल म्याड्रिडले स्पेनिस ला लिगामा लगातार चौथो जित दर्ता गरेको छ । शनिबार घरेलु मैदानमा रियल म्याड्रिडले रियल बेटिसमाथि २-१ को जित दर्ता गरेको हो ।
खेलको नवौं मिनेटमा नै रियलले भिनिसियसको गोलमा अग्रता लियो । डेविड अलाबाको लामो पासलाई भिनिसियसले गोलमा परिणत गरेका थिए । उनले अफसाइड ट्रयाप बिट गर्दै गोलरक्षक अघि बढेको अवस्थामा पेनाल्टी क्षेत्र बाहिरबाट चिप प्रहारमा गोल गरेका थिए ।
बेटिसका लागि १७ औं मिनेटमा सर्जियो कानालेसले बराबरी गोल फर्काए । पेनाल्टी क्षेत्रभित्र बोर्जा इग्लेससले दिएको पासलाई रियलका पूर्व खेलाडी कानालेसले गोलमा परिणत गरे । उनको प्रहारलाई गोलरक्षक थिबाउट कोर्टुवाले ठम्याएपनि रोक्न भने सकेनन् ।
दोस्रो हाफको ६५ औं मिनेटमा रियलका लागि रोड्रीगोले अग्रता दिलाए । उनले रियलको सुन्दर टिम मुभलाई गोलमा परिणत गरेका थिए । फेडे भालभेर्डेले दिएको कटब्याकमा उनको पहिलो प्रहार गोलरक्षक रुइ सिल्भाले बचाउन सकेनन् ।
यस जितसँगै रियलको ४ खेलमा १२ अंक भएको छ । रियल अंक तालिकाको शीर्षस्थानमा छ । बेटिस भने लगातार तीन जितपछि चौथो खेलमा पराजित हुन पुग्यो ।
