एजेन्सी – प्रिमियर लिगको छैठौं साता अन्तर्गत आज राति म्यानचेस्टर युनाइटेड र आर्सनल आमने-सामने हुँदैछन्। सन् २०२२-२३ को सिजन शुरु भएपछि कुनै खेलमा पराजित नभएको आर्सनल र युनाइटेड ओल्ड ट्राफोर्डमा आमने-सामने हुन लागेका हुन्।
आज हुने खेलमा दुवै टोली जित निक्लाने दाउमा हुनेछन्। आर्सनल शत प्रतिशत जितको लयलाई कायम राख्ने दाउमा हुनेछ भने युनाइटेड आर्सनलबाट अंक खोस्ने दाउमा हुनेछ।
आर्सनलले जारी सिजनका पाँच खेल खेल्दा पाँचै खेलम अजित निकालेको छ। आर्सनल १५ अंक सहित प्रिमियर लिगको शिर्ष स्थानमा रहेको छ। त्यस्तै युनाइटेडले भने सिजनको पहिलो दुई खेल हारेपछि तीन जित निकालेको छ। युनाइटेड ९ अंक सहित प्रिमियर लिगको आठौँ स्थानमा छ। आर्सनल विरुद्ध जित निकाल्न सके युनाइटेड सिधै चौथो स्थानमा उक्लिन सक्नेछ।
गत सिजन आर्सनल र युनाइटेड दुवै शिर्ष चारमा अटाउन सकेका थिएनन्। तर यस सिजन भन्दा दुवै टोली शिर्ष चारमा अटाएर च्याम्पियन्स लिग खेल्ने योजनामा छन्। यस्तोमा आजको खेल दुवै टोलीका लागि महत्वपूर्ण हुनेछ।
युनाइटेड र आर्सनल बीचको खेल नेपाली समय अनुसार रातको ९ बजेर १५ मिनेटमा शुरु हुनेछ। खेल कुनै पनि नेपाली च्यानलले प्रशारण गर्ने छैनन्। खेल हेर्न भारतीय च्यानल स्टार स्पोर्ट्स सेलेक्ट वानको भर पर्नुपर्नेछ।
