एजेन्सी – पोर्चुगिज मिडफिल्डर ब्रुनो फर्नान्डेसको गोलमा म्यानचेस्टर युनाइटेडले इंग्लिस प्रिमियर लिगमा लगातार दोस्रो जित निकालेको छ ।
सुरुवाती दुई खेलमा हार भोगेको युनाइटेडले लगातार दोस्रो जित दर्ता गर्ने क्रममा शनिबार राति साउथह्याम्टनलाई १–० ले पराजित गरेको हो । यसअघि युनाइटेडले लिभरपुललाई २–१ ले हराएको थियो ।
सेन्ट मेरिज स्टेडियम साउथह्याम्टनमा युनाइटेडले घरेलु टोली साउथह्याम्टनलाई दबाबमा राखेपनि गोलको लागि दोस्रो हाफ नै कुर्नुपरेको थियो । ५५औं मिनेटमा ब्रुनो फर्नान्डेसले गोल गर्दै युनाइटेडलाई सुरुवाती अग्रता दिलाए । उनले डिएगो डालोटको पासमा गोल गर्न सफल भएका थिए ।
प्रशिक्षक एरिक टेन ह्यागले पोर्चुगिज भेट्रान फरवार्ड क्रिस्टियानो रोनाल्डोलाई पुनः दोस्रो हाफमा मौका दिएका थिए । तर उनले गोल भने गर्न सकेनन् ।
यही खेलमार्फत ब्राजिली मिडफिल्डर क्यासमिरोले युनाइटेडका लागि डेब्यु गरे । उनी ८०औं मिनेटमा एन्थोनी इलांगाको स्थानमा मैदान छिरेका थिए । क्यासमिरो यसै साता ७० मिलियन युरोमा स्पेनिस क्लब रियल म्याड्रिडबाट युनाइटेड पुगेका थिए । यो जितसँगै युनाइटेडको ४ खेलबाट ६ अंक पुगेको छ । पराजित साउथह्याम्टनको ४ खेलबाट ४ अंक नै छ ।
