काठमाडौँ, फागुन १५ । पछिल्लो केहि दिनयता लगातार बढिरहेको सुनको मुल्य बुधबार तोलामा ५ सय रुपैयाले घटेको थियो। तर आज सुनको मुल्य तोलामा २ सय रुपैयाले बढेको छ ।
नेपाल सुनचाँदी व्यवसायी महासङ्घले आज छापावाला सुनको मूल्य प्रतितोला ७९ हजार ७ सय र तेजाबी सुनको मूल्य प्रतितोला ७९ हजार ४ सय रुपैया तोकेको छ ।
बुधबार छापावाला सुनको मूल्य प्रतितोला ७९ हजार ५ सय र तेजाबी सुनको मूल्य प्रतितोला ७९ हजार २ सय रुपैयामा खरिद बिक्री भइरहेको थियो।
अन्तर्राष्ट्रिय बजारमा सुनको मूल्यमा उच्च वृद्धि भएपछि त्यसको प्रभाव नेपाली बजारमा परेको छ । पहेँलो धातु सुनको मूल्य वृद्धि सँगै नयाँ रेकर्डसमेत कायम भएको छ । गत सोमबार भाउ अहिलेसम्म कै महँगो थियो। सो दिन सुनको मुल्य प्रतितोला ८० हजार ३ सय रुपैयामा कायम रहेको थियो।
त्यसै गरि, आज चाँदीको मूल्य भने तोलामा ५ रुपैयाले घटेको छ । आज चाँदीको मुल्य प्रतितोला ९ सय रुपैयामा खरिद बिक्री भइरहेको महासङ्घले जनाएको छ ।
पछिल्लो समय अमेरिका र इरानमा देखिएको तना-व र चीन-अमेरिका व्यापार यु-द्धका कारण सुनको मूल्यमा उतार-चढाव देखिदै आएको छ। महासङ्घका अनुसार पछिल्लो समय सुनको व्यापार ७५ प्रतिशत हाराहारीमा खुम्चिएको छ । सामान्यतः दैनिक करिब २५ देखि ३० किलो सुन खपत हुँदै आएको नेपाली बजारमा अहिले मुस्किलले १० किलो सुन पनि बिक्री हुन नसकेको महासङ्घले जनाएको छ ।
