काठमाडौँ – सवारी दुर्घटनामा परी नायिका महिमा सिलवालको ज्यान गएको छ। बसले महिमा सवार स्कुटरलाई ठक्कर दिएपछि उनको ज्यान गएको हो।
नायिका महिमा चढेको स्कुटरलाई भैरहवाबाट काठमाडौं आउँदै गरेको लु २ ख १३५ नम्बरको बसले धादिङको गजुरी गाउँपालिका वडा नम्बर २ चाम्बासमा बुधबार साँझ ठक्कर दिएको थियो। उपचारको लागि गजुरी स्वास्थ्यचौकी लैजादै गर्दा बाटोमै उनको ज्यान गएको इलाका प्रहरी कार्यालय गजुरीले जनाएको छ।
इलाका प्रहरी कार्यालय गजुरी सोहि स्कुटरमा सवार अर्की एक यात्रुको पनि ज्यान गएको छ। स्कुटरमा पछाडि बसेकी सर्मिला सिलवालको पनि ज्यान गएको हो। उनको उपचारका क्रममा काठमाडौंको ट्रमा सेन्टरमा ज्यान गएको बताइएको छ।
महिमा भरतपुर महानगरपालिका–१२ शिवनगरकी स्थायी वासिन्दा थिइन्। उनले नेपाली चलचित्र क्षेत्रमा चलचित्र ‘कारवाही’ गरेकी थिइन्। ‘अप्रिल फुल’, ‘चियर्स’, ‘दानव’, ‘जिग्लो’लगायत चलचित्रमा पनि उनले काम गरेकी थिइन्।
