श्रीलंकासँगको टि२० सिरिज पनि दक्षिण अफ्रिकाको क्लिन स्विप !

Leaderboard Banner

एजेन्सी – श्रीलंकासँगको टी२० सिरिज घरेलु टोली दक्षिण अफ्रिकाले क्लिन स्विप गरेको छ ।

आइतबार राती सम्पन्न तेस्रो खेलमा डकवर्थ लेविस (डिएल) पद्दतिका आधारमा ४५ रनले विजयी भएपछि अफ्रिकाले टी सिरिज ३-० ले कब्जा गरेको हो ।

१ सय ९९ रनको लक्ष्य पछ्याउने क्रममा ११.१ ओभरमा ६ विकेट गुमाएर १ सय ११ रन बनाएको अवस्थामा वर्षाको कारण खेल केहिसमय रोकिन पुगेको थियो । वर्षा रोकिएपछि डकवर्थ लेविस (डिएल) अनुसार श्रीलंकाले १७ ओभरमा १ सय ८३ रनको लक्ष्य पाएको थियो ।

तर १५.४ ओभरमा अल आउट हुँदै श्रीलंका १ सय ३७ रनमा समेटियो । श्रीलंकाका लागि निरोसन डिक्वेला ३८,इसुरु उडाना ३६ र एन्जिलो परेराले १५ रन बनाउन बाहेक अन्य कुनैपनि ब्याट्सम्यानले दोहोरो अंकमा रन जोड्न सकेनन् ।

अफ्रिका लागि एन्डिले फेहलुकवेओले ३ ओभरमा २४ रन खर्चेर ४ विकेट लिए । त्यस्तै जुनियर डाला र लुथो सिपमालाको नाममा समान दुई विकेट रह्यो । त्यस अघि टस हारेर पहिला ब्याटिङ थालेको घरेलु टोली अफ्रिकाले निर्धारित २० ओभरमा मात्र २ विकेट गुमाउँदै १ सय ९८ रनको विशाल योगफल तयार पारेको थियो ।

अफ्रिका लागि ड्वेन प्रिटोरिसले ४२ बलमा ७ चौका र ३ छक्का प्रहार गर्दै ७७ रनमा अविजित रहे । त्यस्तै रिजा हेन्ड्रिक्सले ५२ बलमा ८ चौका र २ छक्का प्रहार गर्दै ६६ र कप्तान जेपी ड्युमिनी ३४ रनको योगदान दिए ।

श्रीलंका जेफ्री भान्डरसे र सुरुङ्गा लकमलले समान एक विकेट लिए ।यस अघि पाँच ओडीआई सिरिज पनि श्रीलंकाले ५-० ले गुमाएको थियो ।

प्रकाशित : सोमबार, चैत ११, २०७५१०:०३
अर्को समाचार:

हजार्डको १००औं खेलमा बेल्जियमको सहज जित