अष्ट्रेलियालाई उपाधि खडेरी तोड्ने अवसर !

Leaderboard Banner

एजेन्सी – भारतसँगको अन्तिम तथा पाँचौ वान डे खेल पाहुना टोली अष्ट्रेलियाले आज खेल्दै छ । खेल नेपाली समय अनुसार दिउँसो १:४५ देखी फिरोज शाह मैदान कोटला दिल्लीमा सुरु हुने छ ।

चौथो खेलमा अष्ट्रेलियाको सानदार जितसँगै सिरिज २-२ को अवस्थामा छ । आजको खेलको विजेताले सिरीज पनि जित्ने छ । दुवै टोली आजको खेल आफ्नो पक्षमा पार्दै सिरीज जित्न चाहान्छन् । अष्ट्रेलिया भने सिरिज उपाधिको खडेरी तोड्न चाहान्छ । सन् २०१७ जनवरीमा पाकिस्तानलाई ४-१ ले हराउँदै सिरीज जितेको अष्ट्रेलियाले त्यस यताका ६ वान डे सिरीजमा लगातार गुमाएको छ ।

गत मार्चमा तत्कालिन कप्तान स्टिभ स्मिथ र उप कप्तान डेविड वार्नर बल टेम्परिङ काण्डका कारण १ वर्षे प्रतिबन्धमा परेपछि अष्ट्रेलियाले लगातार कमजोर प्रर्दशन गर्न पुग्यो । यी दुवै खेलाडीको प्रतिबन्धपनि आगमी मार्च २९ देखी सकिने छ । यसका बाबजुद जारी भारतसँगको सिरीजमा भने अष्ट्रेलियाले अब्बल प्रर्दशन गरेको छ । चौथो वान डे खेलमा ३ सय ५९ रनको लक्ष्य पुरा गरेको अष्ट्रेलियाको मनोबल पनि उच्च छ । त्यसैले पनि १४ महिनापछि अष्ट्रेलियालाई वान डे सिरीज जित्न राम्रो अवसर छ।

एस्टन टर्नरको विष्फोटक अर्धशतक, पिटर हेन्डस्कम्वको शानदार शतक,उस्मान ख्वाजाको उत्कृष्ट ब्याटिङ र प्याट कमिन्सको उत्कृष्ट बलिङमा चौथो खेल सानदार तरिकाले जितेको थियो । पाँचौ खेलमा पनि भारतलाई हराउँन यी खेलाडीसँगै ग्लेन म्याक्सवेल, शन मार्श, एलेक्स केरी र कप्तान आरोन फिन्चले उत्कृष्ट ब्याटिङ गर्न आवश्यक देखिन्छ ।

यता भारतलाई ४ नम्बर ब्याटिङकै चिन्ता छ । पछिल्लो दुई वर्ष यता लगातार ४ नम्बर ब्याटिङ परिवर्तन गरि रहेको भारतले केहि समय यता आम्बाती रायडूलाई प्रयोग गरेको थियो । तर जारी सिरीजको सुरुवाती ३ खेलमा प्रर्दशन सन्तोकजनक हुन नसकेपछि चौथो नम्बरमा केएल राहुललाई मैदान उतार्यो । राहुल २६ रनमा आउट भए । त्यसैले आजको खेलमा रायडु वा राहुललाई उतार्ने भन्नेमा भारत दोधारमा छ ।

फिरोज शाह कोटला स्पिनरलाई बढि साथ दिने हुँदा पनि भारतले आज चाहाल, कुलदीप र जडेजा तीनलाई नै मैदान उतार्न सक्ने संभावना पनि देखीन्छ । मैदान छोटो हुँदा तीन तीव्र गति र दुई स्पिनरलाई मात्र उतार्ने संभावना पनि उतिनै छ ।

पछिल्लो खेलमा शिखर धवनले शतक र रोहितले उत्कृष्ट अर्धशतक प्रहर गरेका थिए । यी दुई खेलाडी लामो समय देखी खराब लयमा रहँदा चिन्तामा रहेको भारतका लागि भने अब लय समाउँदा केहि सहज हुने छ । त्यस्तै महेन्द्रसिंह धोनीलाई अन्तिम दुई खेलमा आराम दिदा युवा खेलाडी ऋषभ पन्तलाई टोलीमा मौका दिएको छ । तर चौथो खेलको नतिजापछि केहि स्टम्पिङ चुकाएको भन्दै कप्तान विराट कोहलीलेनै असन्तुष्टि जनाएका थिए ।

टी२० सिरीज २-० ले गुमाएको भारत अष्ट्रेलिया भन्दा केहिबढि दवावमा रहने छ । भारतको यो विश्वकप अघि अन्तिम वान डे खेल पनि हो भने अष्ट्रेलियाले पाकिस्तानसँग मार्च २२ देखी ३१ सम्म ५ वान डे सिरीज खेल खेल्दै छ ।

प्रकाशित : बुधबार, फागुन २९, २०७५१०:३७
अर्को समाचार:

क्वाटरफाइनल पुग्न बायर्न र लिभरपुल भिड्दै