ट्रायल निःशुल्क गर्नुपर्ने माग गर्दै यातायात व्यवसायीद्वारा विरोध

Leaderboard Banner

भक्तपुर, सवारी चालक अनुमतिपत्र अर्थात् सवारी ट्रायल निःशुल्क गर्नुपर्ने माग गर्दै भक्तपुरका ड्राइभिङ व्यवसायीहरुले यातायात व्यवस्था कार्यालय भक्तपुरमा विरोध गरेका छन् । भक्तपुरमा सवारी चालक अनुमतिपत्र लिन प्रयोग गरिने सवारीसाधनमध्ये दुईपाङ्ग्रेका लागि रु २०० र चारपाङ्ग्रेका लागि रु ३५० शुल्क लिने गरी कार्यालयले बोलपत्र आह्वान गरेपछि व्यवसायीले विरोध गरेका हुन् ।

भक्तपुर मोटर ड्राइभिङ इन्स्टिच्युटका सञ्चालक गोकुल बनले यातायात कार्यालयले आर्थिक चलखेल गरी मनोमानी ढङ्गबाट गोप्यरुपमा बोलपत्र आह्वान गरेको भन्दै बोलपत्र प्रक्रिया खारेज गर्न माग गर्नुभयो । सर्वाेच्च अदालतले निःशुल्क ट्रायल लिने व्यवस्था मिलाउन दिएको आदेशको अवज्ञा गर्दै जिल्लाका कुनै पनि ड्राइभिङ व्यवसायीहरुसँग कुनै समन्वय नगरी सःशुल्क बोलपत्र आह्वान गरेको बताउनुभयो ।

सुमन मोटर ड्राइभिङ सेन्टरका सञ्चालक गणेश गिरीले नेपालको संविधानले तोकेको यातायात ऐनअनुरुप बाझिएको बताउँदै निःशुल्क सेवा दिने सेन्टर हुँदाहुँदै पनि कार्यालयले सःशुल्क बोलपत्र आह्वान गर्नु गैरकानूनी भएको बताउनुभयो । उहाँले गोप्यरुपमा बोलपत्र आह्वान गरी एउटालाई मात्रै पार्ने षडयन्त्र गरेको बताउनुभयो ।

यातायात व्यवस्था कार्यालय भक्तपुरका प्रमुख किरणप्रसाद ढकालले बोलपत्रका बारेमा राष्ट्रिय दैनिक पत्रिकामा सूचना प्रकाशन गरेको बताउँदै नियमसङ्गत रुपमा बोलपत्र आह्वान गरेको दाबी गर्नुभयो । उहाँले प्रदेश मन्त्रालयले आर्थिक ऐन नियम निर्देशिकाअनुसार निर्णयको चरणमा अहिले नआएको बताउँदै सशुल्क गर्ने भन्ने माग कार्यालयमा आएकाले बोलपत्र आह्वान गरिएको बताउनुभयो ।

कान्तिपुर मोटर ड्राइभिङका सञ्चालक विजय चौलागाईंले यातायात कार्यालयले मनोमानी ढङ्गबाट नियम विपरीत आह्वान गरेको बोलपत्र प्रक्रिया खारेजीका लागि कानूनी प्रक्रियामा जाने बताउनुभयो । भक्तपुरका १६ वटा ड्राइभिङ इन्स्टिच्युटहरुले सशुल्क टेण्डर रद्द गर्न माग गर्दै कार्यालयलाई ज्ञापनपत्रसमेत बुझाएका छन् ।

हालसम्म निःशुल्क ट्रायल सेवा दिँदै आएको मध्यपुर थिमिको इजिवे ट्रायल सेन्टरका सञ्चालक निर्भयबाबु प्रसाईंले भने बोलपत्र नियमसम्मत भएको दाबी गर्दै प्रदेश मन्त्रालयले गरेको निर्णय भएकाले बोलपत्र आह्वान रद्द गर्न नहुने बताउनुभयो ।

प्रसाईंले भन्नुभयो, “यातायात कार्यालयले आह्वान गरेको बोलपत्रमा धेरै व्यवसायीले बोलकबोल फारामसमेत दर्ता गरेका थिए, अहिले तिनै व्यवसायीले बोलपत्र रद्द गर्न माग गरेका छन्, अहिले विरोधका नाममा भक्तपुरमा सञ्चालन भइरहेको ट्रायल सेन्टरलाई बन्द गराएर काठमाडौँ लैजाने षडयन्त्र भइरहेको छ ।” भक्तपुरका बासिन्दालाई काठमाडौँसम्म ट्रायल परीक्षा दिन जाँदा सास्ती भोग्नु परेकाले अहिले भक्तपुरमै सञ्चालन भइरहेको सेवालाई बन्द हुने अवस्थामा पु¥याउन नहुने उहाँको भनाइ छ ।

प्रकाशित : मङ्गलबार, माघ २९, २०७५१९:४०

आफ्नो मत ब्यक्त गर्नुहोस् :

अर्को समाचार:

एपीएफ इन्सपेक्टरको लिखित परीक्षाको नतिजा सार्वजनिक ! हेर्नुहोस् उत्तीर्ण हुनेहरुको सूचीसहित !