यी ५ राजमार्ग पहिरोको उच्च जोखिममा

Leaderboard Banner

काठमाडौं – सरकारले राजधानीलगायत देशका प्रमुख सहरसँग जोडिएका पाँचवटा राजमार्ग पहिरोको उच्च जोखिममा रहेको जनाएको छ ।

देशभर मनसुन सक्रिय हुनै लाग्दा सरकारले त्रिभुवन, पृथ्वी, अरनिको, सिद्धार्थ (बुटवल–पोखरा) र नारायणगढ–मुग्लिन सडकलाई पहिरोको उच्च जोखिम सूचीमा राख्दै तत्काल अवरोध हटाउन सक्ने गरी तयारी गर्न भौतिक पूर्वाधार तथा यातायात मन्त्रालयलाई निर्देशन दिएको हो ।

गृह मन्त्रालयले हालै सार्वजनिक गरेको ‘विपद् जोखिम न्यूनीकरण राष्ट्रिय रणनीतिक कार्ययोजना २०१७–२०३०’ मा मुख्य राजमार्गहरू पहिरोको उच्च जोखिममा रहेको औंल्याइएको छ । यो समाचार आजको कान्तिपुर राष्ट्रिय दैनिक पत्रिकामा प्रकाशित छ।

सरकारले ती क्षेत्रमा २४ सै घण्टा डोजर र एस्काभेटर परिचालन गर्न निर्देशन दिनुका साथै मनसुनले निम्त्याउन सक्ने सम्भावित क्षति न्यूनीकरण र उद्धारका लागि केन्द्रदेखि स्थानीय तहसम्मै खोज र उद्धार टोली परिचालन गर्ने निर्णय गरेको छ ।

प्रधानमन्त्री केपी ओलीको अध्यक्षतामा यसै साता बसेको ‘विपद् जोखिम न्यूनीकरण तथा व्यवस्थापन राष्ट्रिय परिषद्’ बैठकले तीनवटा प्रदेशमा हेलिकप्टरसहितको टोलीलाई तयारी अवस्थामा राख्ने निर्णय गरेको हो ।

प्रधानमन्त्री कार्यालयका प्रवक्ता विनोदबहादुर कुँवरले तत्काल परिचालन हुन सक्ने गरी १ नम्बर प्रदेशको इटहरी, ४ नम्बर प्रदेशको पोखरा र कर्णाली प्रदेशको सुर्खेतमा हेलिकप्टरसहित खोज, उद्धार टोली तयारी अवस्थामा (स्ट्यान्डबाई) राख्ने निर्णय भएको जानकारी दिए ।

मनसुन अवधिभर सेना, नेपाल प्रहरी र सशस्त्र प्रहरीलाई उद्धारका लागि परिचालन गरिने भएको छ ।

जल तथा वर्षा मापनसम्बन्धी उपकरणलाई चालु अवस्थामा राख्दै जनतालाई सुसूचित गर्न जल तथा मौसम विज्ञान विभागलाई निर्देशन दिइएको छ ।

विभागले गत वर्षदेखि बाढीबाट जोगाउन २४ सै घण्टा मुख्य नदीको जलसतहबारे सर्वसाधारणलाई जानकारी दिन थालेको छ ।

विभागको बाढी पूर्वानुमान महाशाखाले नदीमा तीन दिनपछिसम्मको जलसतहबारे प्रक्षेपण गर्दै आएको छ ।

बाढी पूर्वानुमानविज्ञ विनोद पराजुलीले कुनै नदीमा पानीको सतहले खतराको तह नाघ्नुअघि नै सर्वसाधारणलाई सचेत गराउने गरिएको बताए ।

प्रकाशित : आइतबार, असार १०, २०७५०८:१५

आफ्नो मत ब्यक्त गर्नुहोस् :

अर्को समाचार:

प्रदेश ३ मा नेपाली बोल्ने ३१ लाख, कति छ तामाङ र नेवारी भाषा बोल्नेको जनसंख्या ?